Arsenal yegukanye igikombe cya Community Shield itsinze Liverpool (Amafoto)

Yanditswe na Eric Tony Ukurikiyimfura
Kuya 29 Kanama 2020 saa 08:26
Yasuwe :
0 0

Arsenal FC niyo yegukanye igikombe cya Community Shield 2020 nyuma yo gutsinda Liverpolol kuri penaliti 5-4, ubwo amakipe yombi yanganyaga igitego 1-1 mu mukino wabereye i Wembey mu muhezo, kuri uyu wa Gatandatu.

Igikombe cya Community Shield gikinirwa n’ikipe yatwaye Shampiyona n’iyatwaye FA Cup mu mwaka w’imikino uba wabanjirije uwo mukino.

Liverpool yatwaye Shampiyona, yihariye umukino ndetse yashobora kuyobora umukino guhera ku munota wa gatandatu, ariko igitego cyatsinzwe na Virgil van Dijk nticyemerwa kubera ko yateye umupira mu izamu yaraririye.

Nyuma y’iminota itanu, Arsenal yafunguye amazamu ku gitego cyatsinzwe na kapiteni wayo, Pierre-Emerick Aubameyang, ku mupira yatereye inyuma y’urubuga rw’amahina nyuma yo guherezwa na Bukayo Saka.

Eddie Nketiah yananiwe gushimangira intsinzi ya Arsenal ku munota wa 27 ubwo yaherezwaga umupira mwiza na Aubameyang, awutera hejuru y’izamu.

Liverpool yakomeje gusatira cyane Arsenal, ikinira mu rubuga rwayo umwanya munini haba mu gice cya mbere n’icya kabiri, ariko abarimo Mohamed Salah, Sadio Mané na Roberto Firmino bagorwa n’ubwugarizi bwa Arsenal bwari buhagazemo Kieran Tierney, David Luiz na Rob Holding.

Takumi Minamino na Naby Keïta basimbuye Neco Williams na James Milner, bafashije Liverpool kurushaho gusatira ndetse Minamino agerageza ishoti ryanyuze ku ruhande rw’izamu, nyuma y’iminota mike ageze mu kibuga.

Gusatira gukomeye kwa Liverpool, kwatanze umusaruro ku munota wa 73, ibona igitego cyo kwishyura cyatsinzwe n’Umuyapani Takumi Minamino ku mupira wari uvuye kuri Cédric Soares.

Sadio Mané yahushije uburyo bubiri bwiza bwashobora gutuma Liverpool ibona ibindi bitego, imipira isubizwa inyuma n’umunyezamu Emiliano Martínez.

Iminota 90 isanzwe, yarangiye amakipe yombi anganya igitego 1-1, hitabazwa penaliti, Arsenal itsinda 5-4.

Rhian Brewster wateye iya gatatu ya Liverpool ikajya hejuru, ni we wahushije penaliti mu 10 zatewe. Izindi za Liverpool zinjijwe na Mohamed Salah, Fabinho, Takumi Minamino na Curtis Jones.

Abatsinze penaliti za Arsenal ni Reiss Nelson, Ainsley Maitland-Niles, Cédric Soares, David Luiz na Pierre-Emerick Aubameyang.

Biteganyijwe ko Shampiyona y’Icyiciro cya Mbere mu Bwongereza mu mwaka w’imikino wa 2020/21, izatangira tariki ya 12 Nzeri.

Mu mukino w’abagore wabanje, Chelsea yegukanye igikombe cya Community Shield cyakiniwe bwa mbere muri iki cyiciro, itsinze Manchester City ibitego 2-0 bya Erin Cuthbert na Millie Bright.

Pierre-Emerick Aubameyang afungura amazamu ku ishoti yatereye ahagana inyuma y'urubuga rw'amahina
Umunyezamu Alisson Becker yananiwe kugarura umupira wa Aubameyang
Aubameyang yishimira igitego cya Arsenal hamwe na bagenzi be barimo Tierney, Nketiah na Xhaka
Aubameyang yatsindiye ibitego bitanu i Wembley mu 2020 nyuma yo gutsinda muri kimwe cya kabiri no ku mukino wa nyuma wa FA Cup
Takumi Minamino yishyuriye Liverpool nyuma yo kwinjira asimbuye
Minamino na Mohamed Salah bishimira igitego cya Liverpool
Kapiteni wa Arsenal, Pierre-Emerick Aubameyang, ateruye igikombe cya Community Shield ikipe ye yegukanye kuri uyu wa Gatandatu
Arsenal yegukanye igikombe cya Community Shield 2020 itsinze Liverpool

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .