Arsenal yatsinze imikino yose yo mu itsinda rya Europa League, amakipe 32 azakina 1/16 aramenyekana

Yanditswe na Eric Tony Ukurikiyimfura
Kuya 11 Ukuboza 2020 saa 07:50
Yasuwe :
0 0

Arsenal yatsinze Dundalk ibitego 4-2 mu mukino w’umunsi wa gatandatu w’amatsinda ya Europa League wabaye ku wa Kane, iyasoza ifite amanota 18 kuri 18.

Arsenal yabaye ikipe 11 mu mateka ya Europa League yasoje imikino y’amatsinda itsinze imikino yose.

Muri uyu mukino wo mu itsinda B, Eddie Nketiah yafunguye amazamu ku munota wa 12, aroba umunyezamu Gary Rogers nyuma y’amakosa yakozwe na Andrew Boyle.

Nyuma y’iminota itandatu, Mohamed Elneny yatsinze igitego cya kabiri ku mupira yahawe na Emile-Smith Rowe, atera ishoti rikomeye ari muri metero nka 30 mbere y’uko Jordan Flores yishyurira igitego kimwe Dundalk yakiniraga mu rugo.

Joe Willock na Folarin Bolagun batsindiye Arsenal ibindi bitego mu gice cya kabiri mu gihe Sean Hoare yagabanyije ikinyuranyo ku munota wa 85.

Amakipe yabonye itike yo kurenga amatsinda ku munsi wa nyuma ni Napoli, Real Sociedad, Molde, Wolfsberg, Maccabi Tel-Aviv na Young Boys.

Muri Europa League y’uyu mwaka, amakipe yose azakina 1/16 ni: AC Milan, Ajax, Antwerp, Arsenal, Benfica , Braga, Club Brugge, Crvena zvezda, Dinamo Zagreb, Dynamo Kyiv, Granada, Hoffenheim, Krasnodar, Leicester City, Leverkusen, LOSC Lille, Maccabi Tel-Aviv, Manchester United, Molde, Napoli, Olympiacos, PSV Eindhoven, Rangers, Real Sociedad , Roma, Salzburg , Shakhtar Donetsk, Slavia Praha, Tottenham, Villarreal, Wolfsberg na Young Boys.

Tombora ya 1/16 izaba ku wa Mbere tariki ya 14 Ukuboza 2020 saa munani z’amanywa ku cyicaro cya UEFA kiri i Nyon mu Busuwisi.

Imikino ibanza ya 1/16 izaba tariki ya 18 Gashyantare mu gihe iyo kwishyura izaba tariki ya 25 Werurwe 2021.

Eddie Nketiah yafunguye amazamu ku ruhande rwa Arsenal
Nketiah yishimira igitego cya mbere cyabonetse ku munota wa 12
Joe Willock na we yatsinze muri uyu mukino wabereye kuri Aviva Stadium
Mohamed Elneny yatsinze igitego cya kabiri ku ishoti yatereye muri metero nka 30
Elneny na Nketiah bishimira igitego cya kabiri cya Arsenal
Folarin Balogun w'imyaka 19, yatsinze igitego cya kane cya Arsenal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .