00:00:00 IGIHE NETWORK KN KINYARWANDA EN ENGLISH FR FRANCAIS

Arsenal yatsikiye, Benzema yereka abafana Ballon d’Or: Ibyaranze imikino i Burayi

Yanditswe na Byiringiro Osée Elvis
Kuya 24 Ukwakira 2022 saa 12:20
Yasuwe :

Arsenal FC yanganyije na Southampton igitego 1-1, Benzema yereka abafana ba Real Madrid Ballon d’Or aheruka kwegukana mbere yo gutsinda Seville FC ibitego 3-1.

Muri iyi minsi, Arsenal FC iyoboye Shampiyona y’u Bwongereza igeze ku munsi wa 12, ihanzwe amaso na buri umwe wibaza niba intangiriro nziza yagize izayikomeza.

Umukino wa Arsenal FC na Southampton wabaye ku mugoroba wo ku wa 23 Ukwakira 2022.

Arsenal FC ni yo yatangiye umukino isatira cyane, ku munota wa 11 gusa Ben White yazamukanye umupira neza ku ruhande rw’iburyo awuzamura imbere y’izamu Granite Xhaka awufata neza cyane atsinda igitego cya mbere.

Iyi kipe y’i Londres yakomeje guhanahana neza ari nako abakinnyi barimo Gabriel Martinelli na Gabriel Jesus bageragezaga uburyo bwo gushaka igitego cya kabiri ariko ntibikunde.

Southampton yagarutse mu gice ishaka kwishyura igitego, maze nyuma yo kuzamuka ihanahana neza ari nako icenga ab’inyuma ba Arsenal FC, Stuart Armstrong yishyuye igitego ku munota wa 65.

Arsenal FC yakomeje gusatira ishaka igitego cy’intsinzi ariko Southampton yihariraga umupira iyibera ibamba.

Umukino warangiye ari igitego 1-1, uba uwa mbere Arsenal FC inganyije muri uyu mwaka.

Mu yindi mikino Tottenham Hotspur F.C. yatsindiwe mu rugo na Newcastle ibitego 2-1, abafana bivovotera umutoza Antonio Conte.

Ku rundi ruhande, Haaland yafashije Manchester City gutsinda Brighton &Hove Albion ibitego 3-1, muri uyu mukino yatsinzemo ibitego bibiri.

Ku wa Gatandatu, Liverpool FC yatsinzwe na Nottingham Forest igitego 1-0, Chelsea FC inganya na Manchester United igitego 1-1.

Nyuma y’umunsi wa 12, Arsenal FC iracyayoboye shampiyona n’amanota 28, Man City irakurikira n’amanota 26, Tottenham ifite 23, Newcastle yazamutse iri ku mwanya wa kane n’amanota 21.

Muri Espagne, Shampiyona yaho ‘La Liga, yakomeje ku munsi wa 11, amakipe menshi akomeye yitwara neza.

Real Madrid yatsinze Seville bigoranye ibitego 3-1 kuko byabonetse mu minota ya nyuma. Mbere y’umukino Umufaransa Karim Benzema utarawukinnye yabanje kwereka abafana igihembo cya Ballon d’Or aherutse gutwara nk’umukinnyi mwiza w’umwaka washize.

Mu yindi mikino, Atletico Madrid yatsinze Real Betis ibitego 2-1 bya Antoine Griezman.

Barcelona FC ni yo yasoje umunsi ku mugoroba wo ku Cyumweru, inyagira Atletico Bilbao ibitego 4-0, ikomeza kwiruka inyuma ya Real Madrid.

Ku munsi wa 11, Real Madrid iyoboye urutonde rwa shampiyona n’amanota 31, Barcelona ni iya kabiri n’amanota 28, Atletico Madrid iri ku mwanya wa gatatu na 23.

Mu Butaliyani, Napoli ikomeje kwitwara neza ku Cyumweru, tariki 23 Ukwakira 2022, yatsinze bigoranye AS Roma igitego 1-0, AC Milan itsinda Monza ibitego 4-1.

Juventus FC yanyagiye Empoli ibitego 4-0, bigoranye Inter Milan yatsinze Fiorentina ibitego 4-3.

Nyuma y’umunsi wa 11, Napoli irayoboye n’amanota 26, ikurikiwe na AC Milan ku mwanya wa kabiri, ifite amanota 23.

Shampiyona y’u Bufaransa, Ligue 1, yakomeza ku munsi wa 12, nk’ibisanzwe ku wa Gatanu Paris Saint Germain yatsinze Ajaccio ibitego 3-0, Lyon yatsinze Montpellier ibitego 2-1.

Marseille yatsindiwe mu rugo na Lens igitego 1-0.Umukino w’ishiraniro wahuje Lille na Monaco, warangiye Lille iwutsinze ku bitego 4-3.

Mu Budage, Bundesliga na yo yarakomeje Dortmund yari imaze iminsi yitwara nabi, yikubishye agashyi inyagira Stuttgart ibitego 5-0.

Bayern Munich yatsinze Hoffenheim ibitego 2-0, Union Berlin iyoboye itsindwa na Bochum ibitego 2-1.

Nyuma y’umunsi wa 11 wa shampiyona, Union Berlin iyoboye shampiyona n’amanota 23, Bayern Munich ku mwanya wa kabiri ifite amanota 21 mu gihe Dortmund ari iya gatanu n’amanota 19.

Mbere y'umukino na Seville, Benzema yeretse abafana ba Real Madrid Ballon d'Or yatwaye
Lewandowski ashimira Dembélé wabyaje umusaruro umupira yamuhaye agatsinda igitego
Lewandowski akomeje gufasha FC Barcelona kwitwara neza
Erling Haaland ni umwe muri ba rutahizamu bahagaze neza muri Shampiyona y'u Bwongereza
Borussia Dortmund yikubise agashyi yongera kubona intsinzi
Brahim Díaz yafashije AC Milan gutsinda A.C. Monza, atsinda ibitego bibiri muri bine ikipe ye yatsinze
Casemiro yatsinze igitego cye cya mbere muri Manchester United
Arsenal FC yatsikiye inganya umukino wa mbere muri uyu mwaka
Jude Bellingham ni umwe mu nkingi ya mwamba muri Borussia Dortmund
Liverpool FC yatsinzwe amanota atatu akomeza kuba iyanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .