Mu Bwongereza, hakinwaga umunsi wa 10 wa Shampiyona waranzwe no gutsindwa ku makipe akomeye.

Manchester City yugarijwe n’imvune nyinshi cyane yatsinzwe na AFC Bournemouth ibitego 2-1, Arsenal yatsinzwe na New Castle United igitego 1-0, uba umukino wa gatatu wikurikiranya itabona amanota atatu.

Ku wa Gatandatu kandi, Liverpool yaturutse inyuma itsinda Brighton & Hove Albion ibitego 2-1, mu gihe Nottingham Forest imeze neza muri iyi minsi, yatsinze West Ham United ibitego 3-0.

Ku Cyumweru, hari hateganyijwe umukino ukomeye hagati ya Manchester United yari ihanzwe amaso nyuma yo gusezerera umutoza Eric Ten Hag. Iyi kipe yanganyije na Chelsea igitego 1-1, Tottenham Hotspurs inyagira Aston Villa ibitego 4-1.

Liverpool yafashe umwanya wa mbere n’amanota 25, irusha abiri Man City ya kabiri, Nottingham Forest yageze ku wa gatatu na 19, mu gihe Chelsea, Arsenal na Aston Villa zinganya 18. Manchester United iri ku mwanya wa 13 n’amanota 12.

Arsenal ikomeje kubura intsinzi

Man City yatsinzwe na Bournemouth

AFC Bournemouth yatunguye Man City

Chelsea yaguye miswi na Manchester United

La Liga: FC Barcelona iri gutsinda umuhisi n’umugenzi

Mu mpera z’icyumweru, Shampiyona y’Igihugu ya Espagne yakomeje ku munsi wa 11, waranzwe no gusubikwa ku mikino imwe kubera umwuzure wateye iki gihugu.

Mu mikino yabashije gukinwa, FC Barcelona yatsinze umukeba Espanyol ibitego 3-1 yongera ikinyuranyo kuko umukino wa Real Madrid na Valencia wasubitswe.

Atlético de Madrid yatsinze Las Palmas ibitego 2-0, Girona yongeye kubona intsinzi inyagira Leganes ibitego 4-0, mu gihe Real Sociedad yatsinze Seville ibitego 2-0.

FC Barcelona ikomeje kwicara ku mwanya wa mbere n’amanota 33 aho irusha Real Madrid ya kabiri icyenda, Atlético de Madrid ifite 23 ku wa gatatu, mu gihe Villarreal na Osasuna ziganya amanota 21.

Dani Olmo yishimira igitego

FC Barcelona iri gutsinda buri wese

Bundesliga: Ibigugu byitwaye neza

Mu mpera z’icyumweru kandi, Shampiyona y’Igihugu y’u Budage yakomeje ku munsi wa munani, waranzwe no kwitwara neza ku makipe akomeye.

Ku wa Gatandatu, Bayern Munich yatsinze Union Berlin ibitego 3-0, Borussia Dortmund itsinda RB Leipzig ibitego 2-1, Frankfurt inyagira VFL Bochum ibitego 7-2. Bayer Leverkusen yo yanganyije na Stuttgart ubusa ku busa ku wa Gatanu.

Bayern Munich yagize amanota 20, ikurikiwe na Leipzig ifite 17, Frankfurt ku mwanya wa gatatu n’amanota 17. Leverkusen, Dortmund na Freiburg ziranganya amanota 16.

Harry Kane yafashije Bayern Munich kwitwara neza

Serie A: Amakipe akomeye yitwaye neza

Shampiyona y’u Butaliyani yakomeje ku munsi wa 11 waranzwe no kwitwara neza ku makipe akomeye.

Umunsi w’umunsi wabaye ku Cyumweru, aho Napoli ya mbere yatsindiwe mu rugo na Atalanta ibitego 3-0. Indi mikino yabaye, Juventus yatsinze Udines ibitego 2-0, AC Milan itsinda Monza igitego 1-0 na Inter de Milan ibigenza uko imbere ya Venezia.

Napoli yicaye ku mwanya wa mbere n’amanota 25, ikurikiwe na Inter de Milan ifite 24, Atalanta na Fiorentina zinganya amanota 22, mu gihe Juventus ari iya gatanu Juventus n’amanota 21, AC Milan ku wa karindwi na 17.

AC Milan yitwaye neza

Lautaro Martínez akomeje gufasha Inter de Milan

Ligue 1: Ibigugu byarigaragaje

Shampiyona y’u Bufaransa yakomeje ku munsi wa 10 waranzwe no kudakora ikosa ku amakipe akomeye.

Paris Saint-Germain yatsinze Lens bigoranye igitego 1-0, Lille inganya na Lyon igitego 1-1, AS Monaco itsindwa na Angers igitego 1-0.

St Etienne yatsinze Strasbourg ibitego 2-0, Marseille itsinda Nantes ibitego 2-1, mu gihe Toulouse yatsinze Reims igitego 1-0.

Paris Saint-Germain iri ku mwanya wa mbere n’amanota 26, ikurikiwe na Marseille na AS Monaco zinganya 20 na Lille ya kane ifite amanota 18.

Mason Greenwood ntasiba gutsinda muri Marseille

Marseille yafashe umwanya wa kabiri

Bradley Barcola na Dembélé bakomeje gufasha PSG kwitwara neza

PSG ikomeje kwitwara neza