Iyi kipe ikaba yajyanye n’itsinda ry’abagera kuri 40 barimo abakinnyi, abatoza, abafana ndetse n’abanyamakuru aho barangajwe imbere na Chairman wa APR FC Col. (Rtd) Richard Karasira wajyanye na bo mu Misiri.

Nubwo benshi mu bakinnyi bayo uhereye kuri Kapiteni birinze kugira icyo batangaza kuri uyu mukino wo kwishyura, Taddeo Lwanga witwaye neza ku mukino ubanza we yavuze ko byose bigishoboka kuri uyu mukino wa Pramids.

Ati “Mu mupira w’amaguru byose biba bishoboka. Twabonye amakosa twakoze ku mukino ubanza, biradusaba kuzamura urwego no kumva inama z’abatoza ubundi tugasezerera Pyramids.”

APR FC na Pyamids FC zizahurira kuri 30 June Stadium mu mujyi wa Cairo, ni ku wa Gatandatu tariki ya 21 Nzeri 2024 saa Mbiri z’umugoroba.

Umukino ubanza wahurije ano makipe yombi kuri Stade Amahoro wari warangiye banganyije igitego 1-1 aho ibitego bibiri byombi byabonetse muri uwo mukino byatsinzwe n’abakinnyi ba Pyramids.

Aya makipe yombi akaba yari yahuye umwaka ushize mu cyiciro nk’iki cy’amajonjora ya nyuma ashyira amatsinda ya Champions League, aho kuri ubwo Pyramids yari yangiriye APR FC mu Misiri ibitego 6-1 ni nyuma yo kunganyiriza i Kigali 0-0.

APR FC igiye gufata indege yerekeza mu Misiri gukina na Pyramids umukino wo kwishyura uteganyijwe ku wa Gatandatu, tariki ya 21 Nzeri 2024.

Iyi kipe iranyura i Addis Ababa n'i Dubai mbere yo kugera i Cairo aho izakinira uyu mukino w'Ijonjora rya Kabiri ribanziriza amatsinda ya… pic.twitter.com/8sPjAZZF39

— IGIHE Sports (@IGIHESports) September 17, 2024

APR FC yari yakoreye imyitozo kuri Stade Amahoro mbere yo kwerekeza mu Misiri.

Taddeo Lwanga yijeje abafana ba APR FC ko gusezerera Pyramids bishoboka

Abakunzi ba APR FC ngo bashonje bahishiwe