APR FC yerekanye umutoza mushya wungirije, inasobanura impamvu Adil Erradi yahawe amasezerano y’imyaka ibiri

Yanditswe na Eric Tony Ukurikiyimfura
Kuya 17 Kanama 2020 saa 02:41
Yasuwe :
0 0

Mu gitondo cyo kuri uyu wa Mbere, ubuyobozi bwa APR FC burangajwe imbere na Visi Perezida wayo, Maj Gen Mubaraka Muganga, bwerekanye umutoza mushya wungirije, Umunya-Argentine Pablo Morchón.

Uyu muhango wabereye ku cyicaro cy’iyi kipe ku Kimihurura, witabiriwe kandi n’Umunyamabanga Mukuru wa APR FC, Rtd Lt Col Sekaramba Sylvestre n’umutoza mukuru Adil Mohamed Erradi.

Visi Perezida wa APR FC, Maj Gen Mubaraka Muganga, yavuze ko bijyanye na gahunda bafite nyuma yo kongerera amasezerano Adil Mohamed Erradi, bazanye undi mutoza uzamufasha kugeza iyi kipe mu matsinda ya CAF Champions League.

Ati “Mu izina ry’ubuyobozi bwa APR FC, twifuje muri iki gitondo kubagezaho amakuru y’abatoza dufite. Nka Visi Perezida ndabereka umutoza Adil Mohamed wongerewe amasezerano y’imyaka ibiri kubera gahunda dufite y’uko atugeza mu matsinda, byaba ngombwa akayaturenza kubera ubuhanga twamubonyeho.”

“Iby’ingenzi twe twifuzaga twari twabibonye, niyo mpamvu twamugiriye icyo cyizere cyo guhabwa imyaka ibiri, byanatuvunnye cyane kubera ko we nk’umutoza, kubera izo ntsinzi yagezeho, n’ab’iwabo muri Maroc n’ahandi bashatse kumujyana ngo abatoreze ikipe y’Igihugu, barabitubwiye ariko tubabwira ko baba batatubaniye.”

Visi Perezida wa APR FC yakomeje avuga ko Mohamed Adil yabasabye ko bamuha undi mutoza uzamwungiriza, kubera ko intego bafite mu myaka ibiri iri imbere zitoroshye.

Ati “Muri iyi myaka ibiri agiye kuba akora izi nshingano zitoroshye, yadusabye ko twashaka undi mutoza umwungirije ari we uyu munsi muri bubone, yitwa Pablo Morchón, ni Umunya-Argentine na we ufite ubunararibonye mu byo gutoza no kongerera ingufu abakinnyi.”

Pablo Morchón wageze mu Rwanda ku wa Gatanu w’icyumweru gishize, yavuze ko nyuma yo kubwirwa intego za APR FC yumvise ashishikajwe no kugorana nayo.

Ati “APR FC birumvikana nkimenya ibyayo natangiye gushakisha amakuru nsanga ari ikipe y’ubukombe, ifite amateka akomeye. Ni ikipe irusha izindi ibigwi mu Rwanda, ikagira abayobozi b’indashyikirwa ndetse n’icyerekezo kijyanye n’intumbero zanjye mu butoza”.

Pablo Morchón w’imyaka 42, yatoje mu bihugu bitandukanye birimo iwabo muri Argentine, mu Buyapani no mu Bubiligi.

Umunya-Argentine Pablo Morchón wagizwe umutoza wungirije muri APR FC, yeretswe itangazamakuru
Visi Perezida wa APR FC, Maj Gen Mubaraka Muganga yavuze ko APR FC ifite intego yo kugera cyangwa ikarenga amatsinda ya CAF Champions League
Umutoza wa APR FC, Adil Mohamed Erradi, yahawe amasezerano y'imyaka ibiri kubera ubuhanga yagaragaje mu mwaka wa mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .