00:00:00 IGIHE NETWORK KN KINYARWANDA EN ENGLISH FR FRANCAIS

APR FC yatsinze Mukura VS nyuma y’imyaka ibiri itayikuraho ibyishimo (Amafoto na Video)

Yanditswe na Byiringiro Osée Elvis
Kuya 22 Mutarama 2023 saa 09:04
Yasuwe :

APR FC yatsinze Mukura VS igitego 1-0, mu mukino w’Umunsi wa 16 wa Shampiyona wabaye ku Cyumweru, tariki 22 Mutarama 2023, kuri Stade ya Bugesera.

Ikipe y’Ingabo yagiye gukina idaheruka gutsinda iy’ i Huye, kuko yaherukaga kuyikuraho intsinzi ku wa 7 Werurwe 2020, ubwo yayinjizaga ibitego 4-0 mu Karere ka Huye.

Uyu mukino watangiye utuje cyane amakipe yombi yigana, ariko ku munota wa cyenda uburyo bw’igitego bwa mbere bwabonetse ku mupira Mugisha Bonheur yacomekeye Bizimana Yannick atera ishoti rikomeye cyane ariko umunyezamu wa Mukura VS, Nicholas Sebwato umupira awushyira muri koruneri.

Umukino wakomeje gukinirwa hagati ku buryo nta gikomeye amakipe yombi yakoraga, gusa ku munota wa 22 APR FC yongeye guha ubutumwa Mukura VS, ku mupira Niyibizi Ramadhan yateye awukaraze ukubita igiti cy’izamu uragaruka.

Mu minota 25 y’umukino, Mukura VS yakinaga ifite gahunda yo kugarira igacungira ku mipira APR FC yabaga itakaje.

Ikipe y’Ingabo yakomeje gusatira ishaka uko yamenera mu bwugarizi bwa Mukura VS. Niyibizi wari wahushije uburyo bwa mbere, yacomekewe umupira neza na Byiringiro Lague ahindukira neza atsinda igitego cya mbere ku munota wa 35.

Igice cya mbere cyarangiye APR FC itsinze Mukura VS igitego 1-0.

Ikipe y’Ingabo yakomereje aho yasoreje igice cya mbere, ku munota wa 47 umunyezamu Sebwato yakuyemo ishoti rikomeye cyane ryatewe na Ishimwe Anicet.

APR FC yakomeje gusatira bikomeye ishaka igitego cya kabiri, ari na ko Mukura VS na yo yirwanaga mu gukiza izamu gusa. Ku munota wa 60, Ishimwe Anicet yahawe umupira na Mugisha Bonheur azamuka yiruka acenga nk’ibisanzwe, ateye ishoti rikubita igiti cy’izamu uvamo.

Mukura VS yakomeje kurushwa bigaragara ndetse ku buryo nta mahirwe afatika yaremye yashoboraga kuyiha igitego.

Mu minota itanu ya nyuma iyi kipe y’i Huye yashyize APR FC ku gitutu kugira ngo irebe ko yakwishyura igitego yatsinzwe ariko biranga.

Umukino warangiye ikipe y’Ingabo itsinze Mukura VS igitego 1-0 cyatsinzwe na Niyibizi Ramadhan, ihita inafata umwanya wa kabiri ku rutonde rw’agateganyo rwa shampiyona.

Uyu mukino wabanjirijwe n’uwahuje Sunrise FC yasuye Bugesera FC i Nyamata, warangiye amakipe yombi anganya 1-1.

Kuri iki Cyumweru kandi Etincelles FC ibifashijwemo na Gédéon Bendeka yatsinze Rutsiro FC igitego 1-0 mu mukino wabereye kuri Stade Umuganda mu Karere ka Rubavu.

Kugeza ubu ku munsi wa 16 wa shampiyona, AS Kigali irayoboye n’amanota 33, APR FC iri ku mwanya wa kabiri n’amanota 31, inganya na Kiyovu Sports ya gatatu, Gasogi United iri ku mwanya wa kane n’amanota 29 mu gihe Rayon Sports itarakina iri ku wa gatanu n’amanota 28.

Imikino y’Umunsi wa 16 wa Shampiyona:

Ku wa Gatanu, tariki 20 Mutarama 2023

  • Gorilla FC 2-3 Police FC

Ku wa Gatandatu, tariki 21 Mutarama 2023

  • AS Kigali 3-0 Marines FC
  • Espoir FC 0-1 Rwamagana City

Ku Cyumweru, tariki ya 22 Mutarama 2023

  • Rutsiro FC 0-1 Etincelles FC
  • Bugesera FC 1-1 Sunrise FC
  • APR FC 1-0 Mukura VS

Ku wa Kabiri, tariki 24 Mutarama 2023

  • Rayon Sports vs Musanze FC (Stade Muhanga, 15:00)
Abakinnyi 11 ba APR FC babanje mu kibuga
Abakinnyi 11 babanje mu kibuga ku ruhande rwa Mukura VS
Abakinnyi ba APR FC bishimira igitego cyatsinzwe na Niyibizi Ramadhan
Umunyezamu Ishimwe Pierre yishimira igitego hamwe na Niyibizi Ramadhan
Umutoza Mukuru w'Agateganyo wa APR FC, Ben Moussa, akomeje gufasha ikipe ye kwitwara neza
Umutoza Nshimiyimana Eric watoje APR FC yakurikiye uyu mukino
Rutahizamu Bizimana Yannick yikanda aho bari bamaze kumubabaza
Kubwimana Cedric ahanganye na Byiringiro Lague
Kubwimana Cedric ahanganye na Byiringiro Lague
APR FC yatsinze Mukura VS
Ishimwe Anicet yitwaye neza kuri uyu mukino ikipe ye ya APR FC yatsinzemo Mukura VS
Abana bato baserutse kwihera ijisho uyu mukino
N'abafite ubumuga boroherezwa kureba imikino
Abafana ba APR FC bitereye mu bicu nyuma yo kubona igitego cyabahesheje intsinzi
Abafana ba APR FC bari bitabiriye ku bwinshi
Umukino wabereye kuri Stade ya Bugesera

KANDA HANO UREBE ANDI MAFOTO MENSHI

Amafoto: Munyakuri Prince

Video: Iraguha Jotham


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .