Niyonzima Olivier ‘Sefu’ yafunguye amazamu ku munota wa 10 w’umukino nyuma y’uko Omborenga Fitina yari amaze guhana ikosa ryakorewe kuri Imanishimwe Emmanuel.

Mu minota ya mbere APR FC ni yo yahise yinjira mu mukino ndetse Manishimwe Djabel yagerageje ishoti rikomeye yatereye inyuma y’urubuga rw’amahina, umupira ufatwa n’umunyezamu Boniface Oluoch.

Gor Mahia yakiniraga ku kibuga itabashije gukoreraho imyitozo nkuko bigenwa n’Impuzamashyirahamwe y’Umupira w’Amaguru, CAF, kuko yatinze kugera mu Mujyi wa Kigali na yo yaje kwisanga mu mukino ndetse yishyura igitego mbere y’uko igice cya mbere kirangira.

Ku munota wa 28, Gor Mahia yishyuye igitego cyatsinzwe na Kenneth Muguna ku mupira w’umuterekano yatereye nko muri metero 23, Rwabugiri Umar ananirwa kuwukuramo.

Umutoza wa APR FC, Adil Mohammed Erradi, yakoze impinduka mu gice cya kabiri, Buregeya Prince asimburwa na Byiringiro Lague mu gihe Jacques Tuyisenge yasimbuye Danny Usengimana nyuma y’iminota icyenda.

APR FC yahise yongera gusatira Gor Mahia bikomeye ndetse bitanga umusaruro ku munota wa 61, aho Omborenga Fitina yahinduye umupira mu rubuga rw’amahina, myugariro Andrew Juma aritsinda.

Manishimwe Djabel yagerageje uburyo bw’ishoti ryanyuze hejuru y’izamu mu gihe na Tuyisenge yahinduriwe umupira mwiza na Byiringiro Lague, awuteye n’umutwe ugarurwa n’umutambiko w’izamu.

APR FC yashoboraga kubona igitego cya gatatu mu minota ya nyuma, uburyo bwageragejwe na Bizimana Yannick wari uherejwe na Byiringiro Lague, busubizwa inyuma na Boniface Oluoch washyize umupira muri koruneri.

Umukino wo kwishyura uzabera i Nairobi ku wa Gatandatu tariki ya 5 Ukuboza 2020, aho ikipe izakomeza izahura n’izaba yakomeje hagati ya Al Nasr yo muri Libya na Belouizdad yo muri Algeria.

Abakinnyi babanjemo ku mpande zombi:

APR FC: Rwabugiri Umar, Omborenga Fitina, Imanishimwe Emmanuel, Manzi Thierry, Buregeya Prince, Mutsinzi Ange, Niyonzima Olivier Sefu, Bukuru Christophe, Manishimwe Djabel, Danny Usengimana na Bizimana Yannick.

Gor Mahia: Boniface Oluoch, Geoffrey Ochieng, Philemon Otieno, Andrew Juma, Charles Momanyi, Bernard Ondiek, Ernest Wendo, Kenneth Muguna (c), Bertrand Konfor, Tito Okello na Samuel Onyango.

Abakinnyi 11 babanjemo ku ruhande rwa APR FC

Abakinnyi ba Gor Mahia FC babanje mu kibuga

Ba kapiteni bombi: Manzi Thierry wa APR FC na Kenneth Muguna bifotozanya n'abasifuzi bo muri Djibouti

Niyonzima Olivier 'Seif' (imbere) yishimira igitego cya mbere hamwe na Mutsinzi Ange

Umunyezamu Boniface Oluoch agwa mu izamu ku gitego cya kabiri cya APR FC cyitsinzwe na Andrew Juma

Abakinnyi ba APR FC bishimira igitego cya kabiri

Tuyisenge Jacques yahushije uburyo bwabazwe ku mupira wakubise umutambiko w'izamu

Visi Perezida wa APR FC, Maj Gen Mubaraka Muganga, areba uko ikipe ye ikina

Umugenzuzi Mukuru wa RDF, Lt Gen Jacques Musemakweli, akaba na Perezida wa APR FC, ari mu bashyigikiye iyi kipe ihagarariye u Rwanda muri CAF Champions League

Perezida wa FERWAFA, Rtd Brig Gen Sekamana Jean Damascène, yarebye umukino wahuje APR FC na Gor Mahia

Gen Kabarebe James, Umujyanama wa Perezida Kagame mu by'Umutekano akaba n'Umuyobozi w'icyubahiro wa APR FC, yarebye uyu mukino

Minisitiri wa Siporo, Munyangaju Aurore Mimosa, yakurikiye uyu mukino

Amafoto: Rabbin Imani Isaac