00:00:00 IGIHE NETWORK KN KINYARWANDA EN ENGLISH FR FRANCAIS

APR FC yatije Marines FC abakinnyi bane

Yanditswe na Ntare Julius
Kuya 9 Mutarama 2023 saa 08:00
Yasuwe :

Ikipe y’Ingabo z’Igihugu, APR FC, yamaze gutiza abakinnyi bayo bane muri Marines FC y’i Rubavu ngo bajye kuzamura urwego kuko batatanze umusaruro yari ibitezeho.

Aba barimo Mbonyumwami Thaiba yaguze mu mpeshyi y’umwaka wa 2022 imukuye muri Espoir FC akabura umwanya ubanza mu kibuga na Hirwa Jean de Dieu wakinaga mu Intare FC wari wagize ikibazo cy’ibyangombwa byamwerekezaga muri Rayon Sports.

Abandi ni Nsanzimfura Keddy wayigezemo avuye muri Kiyovu Sports mu 2020, akaza guhanishwa kujya mu Intare FC kubera imyitwarire mibi na Nkundimana Fabio yaguze muri Musanze FC muri Kanama, na we akaza kubura umwanya ubanza mu kibuga.

Nsanzimfura Keddy wari warahawe ibihano muri Nzeri 2022 kubera imyitwarire idahwitse, yababariwe n’ubuyobozi bw’Ikipe y’Ingabo z’Igihugu tariki 18 Ukuboza agarurwa mu ikipe ya mbere.

Mu nkuru IGIHE yanditse tariki 19 Ukuboza, yavugaga ko uyu musore ufite impano idasanzwe nyuma yo kubabarirwa yategetswe kuzajya akora imyitozo ataha mu rugo. Ikindi ni uko yagombaga gukora cyane kugira ngo anyure ijisho ry’abatoza ba APR FC. Mu gihe ibi byaba bitabaye, Nsanzimfura yazatizwa muri Marines FC ibarizwa i Rubavu, ari na ko byaje kugenda.

Kuri Hirwa Jean de Dieu, ni umukinnyi ukina mu mutima wa ba myugariro. Ni umwe mu bitwaye neza ku mwanya we mu mwaka w’imikino wa 2021/2022 mu Ikipe ya Marines FC yakiniraga.

Nyuma yo kwitwara neza, Hirwa yabengutswe na Rayon Sports ndetse iyi kipe imusinyisha amasezerano y’imyaka ibiri mu mpeshyi ya 2022.

Nyuma y’aho yagiye gushaka ibyangombwa bimurekura burundu ngo atangire akazi ke muri Rayon sports, ariko yarabyimwe nyuma yo gusanga agifite amezi atatu muri Intare FC.

Akibimenya yafashe icyemezo cyo kwandikira Ubuyobozi bukuru bwa APR FC ariko abwirwa ko ibyo yakoze bitari bikwiye, gusinyira ikipe yindi kandi agifite amasezerano, ibyangombwa ntiyabihabwa asubizwa mu Intare FC.

Marines FC iri ku mwanya wa 15, ubanziriza uwa nyuma, n’amanota arindwi gusa. Mu mikino 15 yakinnye mu gice kibanza cya Shampiyona, yatsinze umukino umwe yahuyemo na Etincelles FC ku bitego 3-0. Yanganyije ine na Rutsiro FC, Police FC, Gorilla FC na Sunrise FC.

Muri iyi mikino kandi, Marines FC yagowe mu bwugarizi dore ko yatsinze ibitego 13 yinjizwa 27 mu izamu ryayo, ifite umwenda w’ibitego 14.

Nsanzimfura Keddy uheruka kubabarizwa na APR FC, yatijwe muri Marines FC
Ndikumana Fabio ntiyabonye umwanya wo gukina muri APR FC
Mbonyumwami Thaiba na we yabuze aho amenera mu busatirizi bwa APR FC
Hirwa Jean de Dieu yasubiye muri Marines FC yakiniye mu mwaka ushize w'imikino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .