APR FC yasubiye ku mwanya wa mbere itsinze Espoir FC (Amafoto)

Yanditswe na Eric Tony Ukurikiyimfura
Kuya 22 Ugushyingo 2019 saa 06:54
Yasuwe :
0 0

APR FC yongeye gufata umwanya wa mbere ku rutonde rwa Shampiyona, itsinze Espoir FC ibitego 3-1 mu mukino w’Umunsi wa Cyenda wabereye kuri Stade ya Kigali i Nyamirambo kuri uyu wa Gatanu.

Ikipe y’Ingabo yakiriye uyu mukino idafite abarimo Imanishimwe Emmanuel wavunikiye mu Mavubi ndetse akaba azamara hanze ibyumweru bibiri adakina.

Espoir FC yaraye i Kigali nyuma yo kuva i Rusizi ejo hashize, yabashije kwihagararaho mu minota 15 ibanza nubwo na yo yanyuzagamo igasatira, aho yashoboraga no gufungura amazamu ku munota wa 18, umupira watewe na Kyambadde Fred ufatwa na Rwabugiri Umar.

Nyuma y’umunota umwe gusa, Niyomugabo Claude yahinduye umupira mu rubuga rw’amahina, ukozweho na myugariro Mushimiyimana Janvier awushyira mu izamu rye, Ikipe y’Ingabo iba ifunguye amazamu.

APR FC yashoboraga kubona igitego cya kabiri igice cya kabiri kigitangira, umupira wahinduwe na Manishimwe Djabel mu rubuga rw’amahina usanga Byiringiro Lague wateye ishoti rikomeye mu izamu, umunyezamu Ndikuriyo Patient awukuramo, usanze Sefu aho ahagaze na we awushyira mu izamu, umunyezamu awushyira muri koruneri.

Ku munota wa 49, Bukuru Christophe yahushije igitego nyuma y’umupira yari ahawe na Usengimana Danny, ariko agerageje kuroba umunyezamu umupira ujya hanze.

Kyambadde Fred yishyuriye Espoir FC nyuma yo gucenga ba myugariro ba APR FC ku mupira yacomekewe na Musasizi John mu rubuga rw’amahina ku munota wa 55.

Umutoza wa APR FC, Mohammed Erradi Adil, yahise akora impinduka ebyiri icya rimwe ku munota wa 60, Byiringiro Lague na Bukuru Christophe bavamo, hinjiramo Rwabuhihi Aimé Placide na Butera Andrew.

Izi mpinduka zahise zitanga umusaruro ku munota wa 61, APR FC ibona igitego cya kabiri cyatsinzwe na Niyomugabo Claude ku mupira yari ahawe na Manishimwe Djabel nyuma yo guhererekanya neza na Nshuti Innocent.

Ku munota wa 63, Danny Usengimana yaboneye APR FC igitego cya gatatu ku mupira Djabel yateye mu izamu umunyezamu akawukuramo, Usengimana wari wawukurikiye ahita asongamo.

Gutsinda uyu mukino byatumye APR FC isubirana umwanya wa mbere n’amanota 21, Police FC izakirwa na Etincelles FC ku Cyumweru ifite 18 ku mwanya wa kabiri mu gihe Mukura Victory Sports ifite amanota 17 ku mwanya wa gatatu.

Undi mukino wabaye kuri uyu wa Gatanu warangiye Sunrise FC inyagiye Heroes FC ibitego 4-1.

Gahunda y’Umunsi wa Cyenda wa Shampiyona

Ku wa Kane tariki ya 21 Ugushyingo 2019

  • Gasogi United 1-1 Musanze FC

Ku wa Gatanu tariki ya 22 Ugushyingo 2019

  • Sunrise FC 4-1 Heroes FC
  • APR FC 3-1 Espoir FC

Ku wa Gatandatu tariki ya 23 Ugushyingo 2019

  • Marines FC vs AS Muhanga (Umuganda Stadium, 15h00)
  • AS Kigali vs Kiyovu Sports (Stade de Kigali, 15h00)

Ku Cyumweru tariki ya 24 Ugushyingo 2019

  • Gicumbi FC vs Rayon Sports FC (Stade de Kigali, 15h00)
  • Bugesera FC vs Mukura VS (Stade Bugesera, 15h00)
  • Etincelles FC vs Police FC (Stade Umuganda, 15h00)
Abakinnyi ba APR FC babanje mu kibuga
Abakinnyi ba Espoir FC babanje mu kibuga
Ba kapiteni bombi; Manzi Thierry na Kyambadde Fred bifotozanya n'abasifuzi bayobowe na Hakizimana Louis
Uwizeyimana Shadrack ahanganiye umupira na Byiringiro Lague
Mutsinzi Ange acira amazi nyuma yo kwisuka amwe mu mutwe
Nshuti Innocent ahanganiye umupira na Mushimiyimana Janvier
Nshuti utabonye izamu, ari mu bagoye Espoir FC mu gice cya mbere
Nkunzimana Sadi wa Espoir FC agerageza kwambura Niyonzima Olivier Sefu umupira
Niyomugabo Claude aterana umupira Nkurunziza Félicien
Umusifuzi Hakizimana Louis abwira abakinnyi ba Espoir FC ngo bagume bahagaze aho yaciye umurongo
Bamwe mu bafana baherekeje Espoir FC y'i Rusizi, bari kumwe n'abafana APR FC
Abafana ba APR FC bari baje nubwo batari benshi
Niyomugabo Claude yinjirana abakinnyi b'inyuma ba Espoir FC
Uyu myugariro w'ibumoso yabageranye mu izamu, abatsindana igitego
Niyomugabo Claude wigaragaje muri uyu mukino, yishimira igitego
APR FC yasubiye ku mwanya wa mbere itsinze Espoir FC
Umutoza wa APR FC, Adil Mohammed Erradi, atanga amabwiriza ku bakinnyi be
Rukundo Jean de Dieu utoza Espoir FC
Visi Perezida wa APR FC, Maj Gen Mubaraka Muganga, yari yaje gushyigikira ikipe ye
Umujyanama wa Perezida Kagame mu by'Umutekano akaba n'Umuyobozi w'Icyubahiro wa APR FC, Gen Kabarebe James, yarebye uyu mukino
Usengimana Danny yatsinze igitego cya gatanu muri Shampiyona

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza