APR FC yapimishije abakinnyi ba Etincelles FC COVID-19

Yanditswe na Eric Tony Ukurikiyimfura
Kuya 15 Ugushyingo 2020 saa 12:34
Yasuwe :
0 0

APR FC yapimishije abakinnyi n’abandi bakozi ba Etincelles FC icyorezo cya COVID-19, mbere yo guhura mu mukino wa gicuti uteganyijwe kuri iki Cyumweru i Shyorongi.

Iki gikorwa cyabaye ku wa Gatandatu ku cyicaro cy’Akarere ka Rubavu, aho hapimwe abakinnyi 24 ba Etincelles FC, abandi bakozi barindwi b’ikipe barimo n’abatoza ndetse n’umunyamakuru umwe.

APR FC yahisemo gupimisha iyi kipe bihurira mu mukino wa gicuti kuri iki Cyumweru, mu rwego rwo kwirinda icyorezo cya COVID-19 mu bakinnyi.

Ikipe y’Ingabo iri kwitegura imikino Nyafurika ya CAF Champions League izakinwa guhera mu mpera z’uku kwezi, yapimishije kandi abakinnyi bayo ku nshuro ya gatanu.

Amabwiriza yo kwirinda COVID-19 yashyizweho n’Impuzamashyirahamwe y’Umupira w’Amaguru muri Afurika (CAF) mbere y’uko hakinwa umunsi wa gatatu n’uwa kane wo mu matsinda yo gushaka itike ya CAN 2021, avuga ko mu gihe ikipe yaba ifite abakinnyi banduye COVID-19 ikaba itabona abakinnyi 11 babanza mu kibuga barimo umunyezamu n’abasimbura bane, izajya ihanishwa guterwa mpaga y’ibitego 2-0.

Nta myanzuro yihariye iratangazwa ijyanye n’amabwiriza areba imikino Nyafurika muri CAF Confederation Cup na CAF Champions League.

Tombola yabaye ku wa Mbere, yasize APR FC izahura na Gor Mahia FC yo muri Kenya mu ijonjora rya mbere ry’imikino Nyafurika ya CAF Champions League.

APR FC izabanza kwakira Gor Mahia FC mu mukino uzaba hagati ya tariki ya 27 n’iya 29 Ugushyingo mu gihe umukino wo kwishyura uzabera i Nairobi hagati ya tariki ya 4 n’iya 6 Ukuboza 2020.

Abakinnyi ba Etincelles FC bapimwe COVID-19 mbere yo guhura na APR FC mu mukino wa gicuti
APR FC yishyuriye Etincelles FC ibisabwa ngo ifatwe ibipimo bya COVID-19
Abakozi barindwi Etincelles FC biyongera ku bakinnyi 24, bapimwe ku wa Gatandatu
Umutoza wa APR FC, Adil Mohamed Erradi, afatwa ibipimo bya COVID-19 ku wa Gatandatu
APR FC imaze gupimisha abakinnyi n'abakozi bayo inshuro eshanu
Rutahizamu Bizimana Yannick apimwa COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .