APR FC yamenyeshejwe igihe ntarengwa cyo gutanga urutonde rw’abakinnyi izakoresha muri Champions League

Yanditswe na Eric Tony Ukurikiyimfura
Kuya 7 Kamena 2020 saa 02:09
Yasuwe :
0 0

Impuzamashyirahamwe y’Umupira w’Amaguru muri Afurika, CAF, yafashe icyemezo cyo guhindura amatariki yo kwandikisha abakinnyi bazakina amarushanwa yayo mu mwaka w’imikino wa 2020/21.

APR FC yegukanye igikombe cya shampiona ya 2019/20 idatsinzwe nyuma y’uko isojwe imburagihe kubera icyorezo cya Coronavirus, ni yo izahagararira u Rwanda muri CAF Champions League ya 2020/21.

Kugeza uyu munsi ntiharamenyekana ikipe izasohoka muri CAF Confederation Cup hagati ya Rayon Sports yabaye iya kabiri nyuma ya APR FC cyangwa AS Kigali yatwaye Igikombe cy’Amahoro cya 2019 (uyu mwaka cyasheshwe burundu kitarangiye) ikaba yakongera gukina iri rushanwa.

Umunyamabanga Mukuru wa FERWAFA, Uwayezu François Régis, aheruka kuvuga ko “nta mwanzuro barabifataho, bategereje ko bazabisabwa na CAF.”

Nk’uko byatangajwe n’Ikinyamakuru Kawarji cyo muri Tunisie, CAF yatangaje ko amakipe azatangaza urutonde rw’abakinyi azakoresha hagati ya tariki ya 1 n’iya 20 Nzeri 2020 mbere y’uko atanga urundi rutonde rwa kabiri kuva tariki ya 21 kugeza kuya 30 Nzeri.

Abakinnyi bazandikishwa mu cyiciro cya kabiri bemerewe gusa gutangira gukina uhereye muri 1/16 cy’irushanwa.

Mu mwaka ushize w’imikino, amakipe yatanze abakinnyi azakoresha muri Nyakanga mu gihe amarushanwa Nyafurika yatangiye muri Kanama 2019, ariko ubu itangira ryayo ryigijwe inyuma kubera icyorezo cya Coronavirus cyibasiye Isi.

Kubera iyo mpamvu, imikino y’ijonjora ry’ibanza (1/32) n’iya 1/16 izaba mu Ukwakira uyu mwaka mu gihe icyiciro gikurikira gishobora gukinwa mu Ugushyingo.

Hari gutekerezwa uburyo mu mwaka utaha w’imikino, nta mikino ya ¼ yabaho mu marushanwa yombi, ikipe ya mbere muri buri tsinda ikabona itike ya ½.

Amarushanwa y’uyu mwaka (2019/20) yahagaze ageze muri ½ ndetse biteganyijwe ko azasubukurwa hagati y’ukwezi gutaha na Nzeri, kure umukino wa nyuma waba bikaba tariki ya 25 Nzeri 2020.

Muri CAF Champions League, Raja Casablanca yo muri Maroc izahura na Zamalek yo mu Misiri mu gihe Wydad Casablanca yo muri Maroc izahura na Al Ahly yo mu Misiri.

Muri Confederation Cup, Pyramids FC yo mu Misiri izahura na Horoya FC yo muri Guinée mu gihe RS Berkane na Hassania Agadir zo muri Maroc nazo zizahura mu wundi mukino.

APR FC izahagararira u Rwanda muri CAF Champions League ya 2020/21

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .