APR FC yakiriye imyambaro mishya n’ibikoresho izifashisha mu mwaka utaha w’imikino (Amafoto)

Yanditswe na Eric Tony Ukurikiyimfura
Kuya 2 Ukuboza 2020 saa 11:58
Yasuwe :
0 0

APR FC yakiriye imyambaro n’ibindi bikoresho byakozwe n’Uruganda Kappa rwo mu Butaliyani izifashisha mu mwaka w’imikino wa 2020/21.

Ku wa Kabiri nibwo APR FC yakiriye ibikoresho birimo imyambaro ikipe izajya yambara yakiriye imikino cyangwa yagiye hanze, imyambaro y’imitozo n’ibindi nk’inkweto abakinnyi batemberana.

Harimo kandi n’ibikoresho bigezweho by’ikoranabuhanga bizajya bifasha ikipe kunoza imyitozo yayo ya buri munsi.

Uruganda Kappa rwigeze kwambika Ikipe y’Igihugu y’u Butaliyani na Manchester City kuri ubu rukorana n’amakipe arimo Napoli yo mu Butaliyani, Aston Villa yo mu Bwongereza na AS Monaco yo mu Bufaransa.

Ikipe y’Ingabo yari isanzwe yambara imyenda yakozwe n’inganda zitandukanye nka Adidas, Errea na Macron.

Visi Perezida wa APR FC, Maj Gen Mubaraka Muganga, aherutse gutangaza ko bambara imyambaro babona ari myiza kandi igezweho kuko nta ruganda bafitanye amasezerano.

Ibinyujije ku rubuga rwayo rwa internet, APR FC yatangaje ko izamurikira abafana bayo n’itangazamakuru iyi myambaro mishya ubwo abakinnyi bazaba bahabwa nimero zizabaranga.

Yagize iti “Kubera guhurirana n’urugendo ikipe igiyemo muri Kenya, gukina umukino wo kwishyura w’ijonjora rya mbere rya CAF Champions League na Gor Mahia, turisegura ko mu gihe cya vuba abakunzi b’ikipe n’itangazamakuru bazerekwa ku mugaragararo ibi bikoresho na nimero abakinnyi bazajya bambara.”

APR FC irerekeza i Nairobi kuri uyu wa Gatatu saa Moya n’iminota 15 z’umugoroba, aho izakina na Gor Mahia ku wa Gatandatu mu mukino wo kwishyura w’ijonjora rya mbere rya CAF Champions League.

Umukino ubanza wabereye kuri Stade ya Kigali ku wa Gatandatu w’icyumweru gishize, warangiye Ikipe y’Ingabo itsinze ibitego 2-1.

Ku wa Kabiri, APR FC yakiriye ibikoresho byakozwe n'Uruganda Kappa rwo mu Butaliyani
Mu mwaka w'imikino wa 2020/21, APR FC izambikwa na Kappa
Mu bikoresho ikipe yahawe harimo n'ibikapu
Inkweto abakinnyi ba APR FC bazajya baserukana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .