00:00:00 IGIHE NETWORK KN KINYARWANDA EN ENGLISH FR FRANCAIS

APR FC na AS Kigali zemerewe kwandikisha abakinnyi 40 muri CAF

Yanditswe na Bukuru JC
Kuya 22 Kamena 2021 saa 03:51
Yasuwe :
0 0

APR FC na AS Kigali azahagararira u Rwanda mu mikino Nyafurika y’umwaka w’imikino wa 2021/2022, yemerewe kwandikisha abakinnyi 40 aho kuba 30 nk’uko byari bisanzwe bigenda.

Kuri uyu wa 22 Kamena 2021 ni bwo Impuzamashyirahamwe y’Umupira w’Amaguru muri Afurika, CAF, yashyize ahagaragara ingengabihe y’amarushanwa y’amakipe mu mwaka w’imikino wa 2021/22.

CAF yatangaje ko umwaka mushya w’imikino uzatangira ku wa 10 Nzeri 2021 hakinwa ijonjora ry’ibanze, imikino y’amatsinda izatangire muri Gashyantare 2022 mu gihe iya nyuma izaba muri Gicurasi uwo mwaka.

APR FC na AS Kigali ni yo makipe azahagararira u Rwanda mu mikino Nyafurika ya 2021/22 nyuma y’uko yizeye gusoreza mu myanya ibiri ya mbere muri Shampiyona y’uyu mwaka isigaje umukino umwe gusa ngo igere ku musozo.

Mbere y’uko hakinwa umunsi wa nyuma ku wa 25 Kamena 2021, APR FC iyoboye Shampiyona n’amanota 16, izigamye ibitego 14 mu mikino itandatu imaze guhuza amakipe umunani ya mbere mu gihe AS Kigali ifite amanota 16, izigamye ibitego 10 ku mwanya wa kabiri.

Umukino uzahuza APR FC na Rutsiro FC ndetse n’uzahuza AS Kigali na Police FC ku wa Gatanu, ni yo izagena uko aya makipe azahagararira u Rwanda muri CAF Champions League yitabirwa n’ikipe yatwaye igikombe cya Shampiyona ndetse na CAF Confederation Cup izitabirwa n’ikipe izaba iya kabiri.

Uretse u Rwanda ruzahagararirwa n’ikipe imwe muri buri rushanwa, ibihugu 12 bihagaze neza bizahagararirwa n’amakipe abiri muri buri rushanwa birimo Algeria, Angola, Repubulika Iharanira Demokarasi ya Congo, Misiri, Guinea, Maroc, Nigeria, Afurika y’Epfo, Sudani, Tanzania, Tunisia na Zambia.

Mu marushanwa y’umwaka utaha w’imikino, CAF yemeje ko abasimbura bazaba ari batanu ku mukino ndetse buri kipe yemerewe kwandikisha abakinnyi 40, aho kuba 30 nk’uko byari bisanzwe.

Buri kipe izaba yemerewe kugira abasimbura icyenda ku ntebe, aho kuba barindwi.Igihe cyo kwandikisha abakinnyi ku makipe muri ‘CAF CMS’, cyongerewe kugeza ku wa 15 Kanama 2021.

APR FC na AS Kigali zamaze kwizera guhagararira u Rwanda mu mikino Nyafurika ya 2021/22

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .