APR FC na AS Kigali zamenyeshejwe igihe zizakinira mu marushanwa Nyafurika

Yanditswe na Eric Tony Ukurikiyimfura
Kuya 1 Nzeri 2020 saa 10:36
Yasuwe :
0 0

Impuzamashyirahamwe y’Umupira w’Amaguru muri Afurika (CAF) yemeje ko amarushanwa yayo y’umwaka utaha w’imikino wa 2020/21, azatangira mu Ugushyingo uyu mwaka.

Kuri uyu wa 1 Nzeri 2020, CAF yatangaje ko irushanwa rya Champions League rihuza amakipe yabaye aya mbere iwayo n’irya CAF Confederation Cup rihuza ayatwaye ibikombe by’igihugu, yombi azatangira hagati ya tariki ya 20-22 Ugushyingo, haba umukino ubanza w’ijonjora ry’ibanze.

CAF yemeje ko kandi umukino wo kwishyura uzaba nyuma y’icyumweru kimwe, hagati ya tariki ya 27 na 29 Ugushyingo 2020 mu gihe ijonjora rya kabiri rizakinwa tariki ya 11-13 Ukuboza no ku wa 18-20 Ukuboza 2020.

Imikino y’amatsinda izaba guhera muri Gashyantare kugeza muri Mata mu gihe ¼ kizakinwa muri Gicurasi, ½ muri Kamena naho umukino wa nyuma wa CAF Champions League ugakinwa ku wa 17 Nyakanga 2021.

APR FC yatwaye Shampiyona ya 2019/20 idatsinzwe ni yo izahagararira u Rwanda muri CAF Champions League mu gihe AS Kigali yakinnye CAF Confederation Cup ya 2019/20, izongera gukina n’iy’uyu mwaka nyuma y’uko Igikombe cy’Amahoro cya 2020 cyasheshwe burundu kubera COVID-19.

CAF yasabye amashyirahamwe y’imikino gutanga amakipe azayahagararira bitarenze iminsi 50 (kugeza tariki ya 20 Ukwakira).

Amakipe azandikisha abakinnyi hagati ya 21 Ukwakira n’iya 5 Ugushyingo mu cyiciro cya mbere ndetse n’iya 6-19 Ugushyingo 2020 mu cyiciro cya kabiri.

Ntiharasozwa amarushanwa Nyafurika ya 2019/20

Kugeza ubu ntiharasozwa amarushanwa Nyafurika y’umwaka w’imikino wa 2019/20, yahagaritswe n’icyorezo cya COVID-19 muri Werurwe ubwo yari ageze muri ½.

Biteganyijwe ko imikino ya Champions League izasubukurwa hagati ya tariki ya 25 n’iya 26 Nzeri haba imikino ibanza ya ½ muri Maroc hagati ya Zamalek-Raja Casablanca na Waydad Casablanca- Al Ahly mu gihe iyo kwishyura izabera mu Misiri hagati ya tariki ya 2 n’iya 3 Ukwakira 2020.

Umukino wa nyuma uteganyijwe hagati ya tariki ya 16 n’iya 17 Ukwakira, ukabera ku kibuga cyihariye mu gihe haba hari ikipe yo muri Maroc n’iyo mu Misiri zawugezeho cyangwa se ukabera muri kimwe muri ibyo bihugu byombi mu gihe amakipe yo mu gihugu kimwe ariyo yaba yageze ku mukino wa nyuma.

Muri CAF Confederation Cup, irushanwa rizasorezwa muri Maroc; aho tariki ya 22 Nzeri, hazaba imikino ibiri ya ½; Pyramids yo mu Misiri ikina na Horoya yo muri Guinée mu gihe RS Berkane na HUSA zo muri Maroc zizahurira mu wundi mukino.

Umukino wa nyuma uzabera kuri Stade Prince Moulay Abdellah y’i Rabat ku wa 27 Nzeri 2020.

APR FC izahagararira u Rwanda muri CAF Champions League ya 2020/21
AS Kigali ni yo izahagararira u Rwanda muri CAF Confederation Cup ya 2020/21

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .