APR FC mu nzira y’inzitane, Rayon Sports ku bibuga bibi- Ni nde uhabwa amahirwe ku gikombe?

Yanditswe na Eric Tony Ukurikiyimfura
Kuya 23 Mata 2019 saa 03:33
Yasuwe :
0 0

Imikino irindwi ni yo ibura ngo shampiyona y’icyiciro cya mbere mu Rwanda igere ku musoza. APR FC na Rayon Sports ni yo makipe ahabwa amahirwe ku gikombe n’ubwo na Mukura Victory Sports itarakurayo amaso.

IGIHE yakoze isesengura ku mikino isigaye ku makipe yombi n’ufite amahirwe ku gikombe cy’uyu mwaka.

Iyi shampiyona izakomeza mu mpera z’icyumweru, hakinwa umunsi wa 24. APR FC iri ku isonga n’amanota 54. Rayon Sports yagabanyije ikinyuranyo cy’amanota atandatu yarimo, hasigaramo atatu nyuma yo gutsinda mukeba igitego 1-0 ku wa Gatandatu.

Mukura Victory Sports ifite akazi katoroshye ndetse biragoye ko yatwara igikombe cya shampiyona y’uyu mwaka itambutse kuri aya makipe yombi ayiri imbere. Iyi kipe y’i Huye ifite amanota 48 ku mwanya wa gatatu.

Dore imikino isigaye ku makipe yose ashobora gutwara igikombe

APR FC: Bugesera (mu rugo, Nyamirambo), Kiyovu Sports (hanze, Mumena), AS Kigali (mu rugo, Nyamirambo), Gicumbi FC (hanze, Gicumbi), AS Muhanga (hanze, Muhanga), Espoir FC (mu rugo, Nyamirambo) na Police FC (hanze, Mumena).

Rayon Sports: AS Muhanga (hanze, Muhanga), Espoir FC (mu rugo, Nyamirambo), Police FC (hanze, Nyamirambo), Amagaju FC (hanze, Nyamagabe), Musanze FC (mu rugo, Nyamirambo), Kirehe FC (hanze, Kirehe) na Marines FC (mu rugo, Nyamirambo).

Mukura VS: Police FC (mu rugo, Huye), Amagaju FC (hanze, Nyamagabe), Musanze FC (mu rugo, Huye), Kirehe FC (hanze, Kirehe), Marines (mu rugo, Huye), Etincelles (hanze, Rubavu) na Gicumbi FC (mu rugo, Huye).

Ni nde uhabwa amahirwe ku gikombe cya shampiyona?

Gutsindwa na mukeba ku wa Gatandatu, byagabanyije amahirwe ya APR FC cyane ko iyo iramuka itsinze uyu mukino yari kwizera igikombe ku rugero rwa 80%. Kuri ubu APR FC biragoye kwemeza ko izatwara shampiyona y’uyu mwaka n’ubwo kuri ubu ifite amahirwe menshi kurusha izindi nk’ikipe iziri imbere.

Iyi kipe ya Gisirikare ifite imikino ikomeye irimo uwa Kiyovu Sports, AS Kigali na Police FC igomba kwerekaniraho ko ari ikipe ikomeye koko ku buryo ikwiye igikombe. Ntawakwirengagiza kandi umukino izasuramo Gicumbi FC ku kibuga cyayo cyuzuyemo imigunguzi.

Kiyovu Sports ushobora kuyifata nk’ikipe idakomeye ku buryo yahagarika APR FC ariko twibuke ko mu mwaka ushize w’imikino, yayitsindiye ku Mumena igitego 1-0, ikayibonaho intsinzi ya mbere mu myaka 12.

Rayon Sports yagarutse mu rugamba rwo gutahanira shampiyona, ifite amahirwe menshi mu gihe APR FC yagira aho itakaza amanota mu mikino irindwi isigaye. Iyi kipe ikomoka i Nyanza isigaranye amakipe adakomeye cyane uretse umukino wa Police FC. Aha ariko, izaba ifite ihurizo ryo kwikura ku bibuga bibi by’amakipe y’Amagaju na Kirehe FC mu gihe yaba agihatanira kuguma mu cyiciro cya mbere.

Police FC na yo ntabwo ari ikipe yakundaga kugora Rayon Sports, ariko yatunguranye muri shampiyona y’uyu mwaka iyitsinda igitego 1-0 mu mikino ibanza mu gihe Amagaju FC akomeje kuvugwamo ikibazo cy’amikoro na yo yatsinze Rayon Sports mu mwaka ushize w’imikino, ayisanze i Kigali.

Mukura Victory Sports ifite amahirwe make ku gikombe kuko amahirwe yayo kugeza ubu ashingiye ku gutakaza amanota kw’aya makipe yandi, aho bigoye ko yose yakwirangaraho icyarimwe, akayiha umwanya igatambuka. Icyerekana ko Mukura ishaka igikombe ni ukubanza gutsinda Police FC mu mukino uzaba ku Cyumweru. Ikipe y’i Huye ntirabona itsinzi imbere y’abashinzwe umutekano guhera mu 2011 mu mikino ya shampiyona.

APR FC na Rayon Sports zirahabwa amahirwe menshi ku gikombe
APR FC ifite igikombe cya shampiyona giheruka, ifite akazi katoroshye mu gushaka icy'uyu mwaka
Rayon Sports yagarutse mu rugamba rwo gushaka igikombe ubwo yatsindaga APR FC ku wa Gatandatu
Mukura Victory Sports na yo ifite amahirwe ku gikombe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza