00:00:00 IGIHE NETWORK KN KINYARWANDA EN ENGLISH FR FRANCAIS

Antonio Conte yandagajwe, Real Madrid ku bitugu bya Benzema: Shampiyona z’i Burayi zakomeje

Yanditswe na Iradukunda Olivier
Kuya 20 Ukwakira 2022 saa 01:30
Yasuwe :

Imikino yo ku Mugabane w’u Burayi yakomeje muri iki cyumweru hagati, amakipe akomeye ariko Manchester United yo mu Bwongereza itsinda Tottenham Hotspur ibitego 2-0 bikomeza gushyira mu kaga Antonio Conte mu gihe Real Madrid yo muri Espagne yanyagiye Elche ibitego 3-0.

Iyi mikino muri shampiyona zitandukanye yakinwe ku mugoroba wo ku wa Gatatu, tariki ya 19 Ukwakira 2022.

Tottenham Hotspur yakinaga na Manchester United yarushijwe mu majya n’amazi mu minota 90 y’umukino. Manchester United yabonye uburyo bugera ku 10 bwashoboraga kubyara ibitego ariko umunyezamu Hugo Lloris akomeza gutabara ikipe ye.

Nubwo uyu munyezamu yari ahagaze neza ariko ntibyabujije Frederico Fred [47’] na Bruno Fernandes [69’] kumubonamo ibitego bibiri byabonetse muri uyu mukino.

Umutoza wa Tottenham Hotspur, Antonio Conte, yibutse ibitereko yasheshe akora impinduka eshatu mu mukino kuva ku munota wa 82, barimo Davinson Sánchez wasimbuye Yves Bissouma, Ryan Sessegnon wasimbuye Eric Dier na Lucas Moura wasimbuye Matt James Doherty.

Ntacyo izi mpinduka zongereye mu mukino, akora izindi zari zatinze ku munota wa 89, Rodrigo Bentancur asimburwa na Oliver Skipp, bikomeza kuba iby’ubusa akomeza gusatirwa.

Uyu mutoza amaze gutakaza imikino ibiri ikomeye muri Shampiyona y’u Bwongereza Premier League harimo uwa Arsenal FC na Manchester United, bikomeza kugorana kuko atsinda amakipe mato nabwo bigoranye, ku makipe manini akahata ibaba.

Manchester United yo ifite umukino ukomeye ku wa Gatandatu, tariki ya 22 Ukwakira izakirwa na Chelsea ku kibuga Stamford Bridge.

Ntabwo ari mu Bwongereza bakinaga gusa kuko no muri Espagne imikino ya La Liga yakomeje, aho ikipe ya Karim Benzema yerekanye ko ataherewe Ballon d’Or ubuntu, afasha Real Madrid gutsinda Elche ibitego 3-0.

Uyu mugabo Karim Benzema yabonye igitego hakiri kare cyane, ariko VAR iracyanga kuko habayemo kurarira. Mugenzi we Federico Valverde yaboneye Real Madrid igitego cya mbere ku munota wa 11.

Igice cya mbere cyarangiye Karim Benzema yangiwe ikindi gitego we na David Alaba kuko byose byavugwaga ko habayemo kurarira. Gusa mu gice cya kabiri ku munota wa 71 yarakibonye, mbere yo gutsinda icya gatatu cya Marco Asensio.

Umukino warangiye ari ibitego 3-0 mu bitego bitandatu byagiye mu izamu. Real Madrid byayishyize ku mwanya wa mbere irusha FC Barcelona amanota atandatu, iyi kipe yo ifite umukino na Villarreal ku mugoroba wo kuri uyu wa 20 Ukwakira 2022.

Mu mukino utaha, Real Madrid izakira Sevilla ku kibuga cyayo Santiago Bernabeu ku wa Gatandatu, tariki ya 22 Ukwakira 2022.

Manchester United yo mu Bwongereza yihereranye Tottenham Hotspur iyitsinda ibitego 2-0
Real Madrid yangiwe ibitego bitatu ariko umukino urangira itsinze 3-0

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .