Andrea Pirlo yagizwe umutoza mukuru wa Juventus

Yanditswe na Eric Tony Ukurikiyimfura
Kuya 9 Kanama 2020 saa 10:22
Yasuwe :
0 0

Ku myaka 41, Umutaliyani Andrea Pirlo yagizwe umutoza mushya wa Juventus, asimbuye Maurizio Sarri wirukanywe ku wa Gatandatu.

Pirlo wabaye umukinnyi ukomeye akinira Juventus hagati ya 2011 na 2015, yasinye amasezerano y’imyaka ibiri azarangira tariki 30 Kamena 2022.

Mu mpera z’ukwezi gushize nibwo yari yagizwe umutoza w’ikipe y’abatarengeje imyaka 23 ya Juventus, ariko nyuma yo kwirukanwa kwa Maurizio Sarri, ahabwa ikipe ya mbere.

Sarri yasezerewe ku wa Gatandatu nyuma y’umusaruro muke muri UEFA Champions League, aho Juventus yasezerewe na Lyon muri 1/8 nubwo yari yatsinze ibitego 2-1 mu mukino wabaye ku wa Gatanu.

Mu mikino 164 yakiniyemo Juventus mu gihe cy’imyaka ine, Andrea Pirlo yegukanye ibikombe bine bya Shampiyona, Coppa Italia na Super Cup inshuro ebyiri.

Yabaye kandi umukinnyi ukomeye mu ikipe y’Igihugu y’u Butaliyani, aho ari mu begukanye Igikombe cy’Isi cya 2006 cyabereye mu Budage.

Pirlo wasezeye umupira w’amaguru mu 2017 ubwo yakiniraga New York City FC yo muri Major League Soccer, yaherukaga gutangaza ko ashaka gutera ikirenge mu cya Pep Guardiola utoza Manchester City na Zinedine Zidane utoza Real Madrid.

Guardiola na Zidane, bombi babanje gutoza amakipe ya kabiri ya Barcelone na Real Madrid mbere yo kuba abatoza bakuru b’amakipe ya mbere.

Andrea Pirlo agiye gutoza Gianluigi Buffon bakinannye ndetse akaba amurusha umwaka umwe, kuko uyu munyezamu afite imyaka 42.

Andrea Pirlo w'imyaka 41, yagizwe umutoza mushya wa Juventus asimbuye Maurizio Sarri wirukanywe
Pirlo yabaye umukinnyi ukomeye muri Juventus hagati ya 2011 na 2015

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .