00:00:00 IGIHE NETWORK KN KINYARWANDA EN ENGLISH FR FRANCAIS

Amavubi yihambiriye kuri Sénégal, akagozi gacika ku munota wa nyuma

Yanditswe na Israel Ishimwe
Kuya 7 June 2022 saa 11:27
Yasuwe :

Igitego cya Rutahizamu Sadio Mané cyo ku munota wa nyuma cyafashije Ikipe y’Igihugu ya Sénégal kubona amanota atatu itsinze iy’u Rwanda mu mukino w’Umunsi wa kabiri wo mu Itsinda L ryo gushaka itike y’Igikombe cya Afurika kizabera muri Côte d’Ivoire mu 2023.

Uyu mukino u Rwanda rwawakiririye kuri Stade Me Abdoulaye Wade mu Mujyi wa Dakar muri Sénégal, kuri uyu wa Kabiri, tariki ya 7 Kamena 2022.

U Rwanda rwihagazeho iminota 90 yose y’umukino ariko ku wa nyuma w’inyongera rutsindwa igitego cyabonetse kuri penaliti yinjijwe neza na Sadio Mané.

Umunya-Espagne Carlos Alós Ferrer utoza Amavubi yari yakoze impinduka mu bakinnyi yifashishije ku mukino wa mbere wahuje u Rwanda na Mozambique. Wabereye mu Mujyi wa Johannesburg kuri FNB Stadium aho amakipe yanganyije igitego 1-1.

Uyu munsi yitabaje Bosco Ruboneka na Kevin Muhire mu mwanya wa Hakizimana Muhadjili na Nishimwe Blaise.

Uyu mukino watangiye Sénégal iyobowe n’ubwugarizi bwa Sadio Mané isatira Amavubi ariko ba myugariro b’u Rwanda bagahagarara neza.

Ku munota wa 35, Pape Matar Sarr yateye coup franc, ariko umupira ukomeye yagerageje kuboneza mu izamu ukurwamo na Kwizera Olivier.

Ubundi buryo bw’igitego bwabonetse ku munota wa 43 ubwo Sadio Mané yazamukanaga umupira agacenga ab’inyuma b’Amavubi ariko umupira yacomekeye Pape Sarr, uyu yawuteye uca hejuru y’izamu.

Ku munota wa 45, Amavubi yagerageje gusatira ariko umupira wazamukanywe neza na Ally Serumogo yawuteye ariko uruhukira mu maboko y’umunyezamu Edouard Mendy.

Mu minota 45 ya mbere, abakinnyi b’Amavubi bashoboye kwihagararaho ndetse ntibinjizwa igitego.

Igice cya kabiri cyatangiye Amavubi agaragaza amashagaga yo gusatira. Ku munota wa 46, Serumogo yazamukanye umupira awuteye ashaka ba rutahizamu ufatwa na Rafael York agerageje gucenga akorerwaho ikosa ariko rihanwe ntiryatanga umusaruro.

Kugeza ku munota wa 51, abafana ba Sénégal izwi nka ‘Les Lions de la Teranga’ basaga n’abumiwe kuko ikipe yabo yari itarabona amahirwe afatika yo kwinjiza igitego ndetse umurindi wo gushyigikira ikipe wagendaga ugabanuka.

Ku munota wa 52, Amavubi yabonye amahirwe yashoboraga kubyara igitego ariko umupira mwiza Rafael York yacomekeye Kapiteni w’u Rwanda, Kagere Meddie, uyu rutahizamu yawuteye uca hejuru y’izamu.

Sénégal yashakaga kotsa igitutu Amavubi yakoze impinduka ebyiri ku munota wa 57 aho Umutoza Aliou Cissé yinjije mu kibuga Saliou Ciss afata umwanya wa Fodé Ballo-Touré mu gihe Pape Matar Sarr yasimbuwe na Keita Baldé Diao.

Izi mpinduka ntacyo zatanze ku ruhande rwa Sénégal kuko yakomeje gushaka igitego ariko irakibura kuko Kwizera Olivier yayibereye ibamba.

Ku munota wa 71, uyu mutoza yinjije mu kibuga abandi bakinnyi babiri barimo Pape Alassane Gueye na Famara Diédhiou, basimbuye Nampalys Mendy na Habib Diallo.

Aha ni ho Sénégal yatangiye gusatira ndetse Sadio Mané atangira kugaragara cyane ashaka gutsinda.

Carlos Alós Ferrer utoza Amavubi na we ku munota wa 74 yakoze impinduka aho yakuyemo Muhire Kevin wari wabonye ikarita y’umuhondo yinjiza Nishimwe Blaise.

Abakinnyi b’Amavubi bakinaga bugarira bakomeje kwitwara neza ndetse byatumye Aliou Cissé yinjiza mu kibuga Pape Abou Cissé w’imyaka 26, asimbuye Youssouf Sabaly. Ibi byongereye imbaraga mu busatirizi bwayo.

Amavubi yashakaga kongera imbaraga mu busatirizi na yo yakoze impinduka ku ku munota wa 85, Yves Mugunga na Muhadjiri Hakizimana basimbura York Rafael na Meddie Kagere.

Mu minota y’inyongera ni bwo Ombolenga Fitina yinjiye mu kibuga asimbura Emmanuel Imanishimwe.

U Rwanda rwokejwe igitutu mu minota ya nyuma ndetse Sénégal yabonye penaliti ku munota wa 94 [habura amasegonda 18 ngo iminota itanu y’inyongera irangire] ku ikosa ryakozwe na Ange Mutsinzi.

Iyo penaliti yinjijwe neza na Sadio Mané nyuma y’uko Kwizera Olivier yakurikiye umupira ariko ananirwa kuwukuramo. Uyu rutahizamu yahise yuzuza ibitego 33 mu Ikipe y’Igihugu.

Muri uyu mukino u Rwanda rwabonye amakarita atatu y’umuhondo arimo iyahawe Kwizera Olivier, Muhire Kevin na Ange Mutsinzi. Mu gihe Sénégal yabonye ikarita imwe ya Nampalys Mendy.

Sénégal yasatiriye izamu ry’u Rwanda yabonye koruneri eshanu mu gihe Amavubi ntayo yateye.

U Rwanda rufite inota rimwe mu mikino ibiri rumaze gukina yo gushaka itike yo gukina Igikombe cya Afurika cya 2023.

Mbere yo gutangira uyu mukino, hibutswe Baziki Peter wari ushinzwe Ibikoresho by’Ikipe y’Igihugu y’u Rwanda (Kit Manager) witabye Imana ku wa 14 Gashyantare 2022.

Uyu mugabo wari amaze imyaka umunani mu kazi ko gucunga ibikoresho, yaguye muri CHUK aho yari arwariye.

Abakinnyi babanje mu kibuga ku mpande zombi:

U Rwanda: Olivier Kwizera, Ally Serumogo, Ange Mutsinzi, Salomon Nirisarike, Manzi Thierry, Djihad Bizimana, Bosco Ruboneka, Rafael York, Emmanuel Imanishimwe, Kevin Muhire na Meddie Kagere.

Sénégal: Edouard Mendy, Youssouf Sabaly, Kalidou Koulibaly, Abdou Diallo, Habib Diallo, Idrissa Gueye, Nampalys Mendy, Pape Matar Sarr, Ismaila Sarr, Fode Toure na Sadio Mané.

Sadio Mané ahanganye n’abakinnyi b’Amavubi barimo Serumogo Ally na Ruboneka Bosco [7]
Amavubi yitwaye neza cyane mu bwugarizi bwayo bwari buyobowe n’abarimo Manzi Thierry [17] na Imanishimwe Emmanuel [2] bakinira FAR Rabat yo muri Maroc
Amavubi yihambiriye kuri Sénégal, akagozi gacika ku munota wa nyuma
Abakinnyi barimo Djihad Bizimana (ubanza ibumoso), Kevin Muhire na Bosco Ruboneka baganira uko bitwara mu kibuga

Amafoto: FERWAFA


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .