00:00:00 IGIHE NETWORK KN KINYARWANDA EN ENGLISH FR FRANCAIS

Amavubi yagenewe miliyari 2,5 Frw mu mwaka wa 2023

Yanditswe na Eric Tony Ukurikiyimfura
Kuya 23 Ukuboza 2022 saa 11:36
Yasuwe :

Ikipe z’Igihugu z’Umupira w’Amaguru mu byiciro bitandukanye “Amavubi” zagenewe miliyari 2,5 Frw mu ngengo y’imari y’Ishyirahamwe Nyarwanda rya Ruhago, FERWAFA mu mwaka wa 2023.

FERWAFA iteganya ko mu mwaka utaha izakoresha ingengo y’imari ingana na 8.140.773.629 Frw.

Iyi ngengo y’imari yagabanyijwe mu bice bitatu, icya mbere kirimo ibikorwa bya FERWAFA birimo guhemba abakozi n’ibikoresho byo mu biro, icya kabiri ni icy’imishinga minini yo kubaka ibibuga mu gihe icya gatatu kireba amakipe y’Igihugu “Amavubi”.

Hateganywa ko miliyari 2,5 Frw ari yo akenewe kugira ngo amakipe y’igihugu mu byiciro bitandukanye azabashe kwitegura neza imikino mpuzamahanga azitabira ndetse akaba yanakina iya gicuti.

Muri ayo mafaranga, FERWAFA igaragaza ko miliyoni 500 Frw azakoreshwa mu mwiherero utegura imikino ya gicuti y’Ikipe y’Igihugu nkuru iri ku ngengabihe ya FIFA. Aho harimo miliyon 200 Frw y’amacumbi, miliyoni 200 Frw y’ingendo z’imbere mu gihugu n’izakorwa ikipe igiye gukina hanze ndetse n’andi miliyoni 100 Frw agenewe ibindi bitandukanye birimo ibikoresho.

Imikino ya CECAFA izitabirwa n’Amavubi makuru yagenewe miliyoni 400 Frw, imikino ine yo gushaka itike ya CAN 2023 igenerwa miliyoni 550 Frw naho imikino ibiri yo gushaka itike y’Igikombe cy’Isi iteganyirizwa miliyoni 450 Frw.

Ikipe y’Igihugu y’Abatarengeje imyaka 23 yateganyirijwe miliyoni 200 Frw naho iy’Abagore iteganyirizwa miliyoni 175 Frw.

Hari kandi andi miliyoni 400 Frw yateganyirijwe indi mikino yaboneka ndetse n’ibikoresho byagurirwa Ikipe y’Igihugu Nkuru.

Muri uyu mwaka wa 2022 turi gusoza, FERWAFA yari yegeneye amakipe y’Igihugu ingengo y’imari ingana na miliyari 2,21 Frw mu gihe mu 2021 yari miliyari 1.595 Frw.

Ku wa Kane, tariki ya 22 Ukuboza 2022, ni bwo FERWAFA yatumiye abanyamuryango bayo mu Nama y’Inteko Rusange izabera muri Lemigo Hotel, ikemerezwamo iyi ngengo y’imari ku wa 21 Mutarama 2023.

Ikipe y'Igihugu 'Amavubi' yagenewe miliyari 2,5 Frw mu mwaka wa 2023
Amavubi y'Abagore na yo yatekerejweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .