Amavubi U-17 yasezerewe muri CECAFA iri kubera i Rubavu

Yanditswe na Eric Tony Ukurikiyimfura
Kuya 18 Ukuboza 2020 saa 02:00
Yasuwe :
0 0

Ikipe y’Igihugu y’u Rwanda y’ingimbi, Amavubi U-17, yasezerewe muri CECAFA iri kubera kuri Stade Umuganda i Rubavu nyuma yo kuba iya nyuma mu itsinda B ry’iri rushanwa rigamije gushaka itike y’Igikombe cya Afurika cya 2021 kizabera muri Maroc.

U Rwanda rwatsinzwe na Tanzania ku wa Mbere mu gihe umukino warwo wa nyuma wo mu itsinda, wabaye ku wa Gatatu, runganya na Djibouti ubusa ku busa.

Amahirwe amwe Amavubi U-17 yari asigaje muri iri rushanwa ni uko Tanzania yari gutsinda Djibouti ibitego birenze ibyo yarutsinze mu mukino wa nyuma wo mu itsinda B wabaye kuri uyu wa Gatanu.

Tanzania yanganyije na Djibouti igitego 1-1 mu mukino watangiye saa Sita z’amanywa, bituma u Rwanda rusezererwa rutarenze amatsinda y’iri rushanwa ryahuje ibihugu bitandatu byo mu Karere ka Afurika y’Iburasirazuba no Hagati (CECAFA).

Serengeti Boys ya Tanzania, yafunguye amazamu ku gitego cyitsinzwe na Abdek Mouhamed ku munota wa 33, ariko Djibouti yishyurirwa na Moktar Djuma Ali ku mupira w’umuterekano wo ku munota wa 80.

Kunganya uyu mukino byatumye Tanzania izamuka iyoboye itsinda B n’amanota ane mu gihe Djobouti yagize amanota abiri imbere y’u Rwanda rufite inota rimwe.

Mu itsinda A, Uganda yabonye itike ya ½ nyuma yo kunyagira Kenya ibitego 5-0 ku wa Gatatu, irakina na Ethiopia ifite inota rimwe, kuri uyu wa Gatanu saa Cyenda.

Muri ½, ikipe ya mbere mu itsinda A izahura na Djibouti yabaye iya kabiri mu itsinda B mu gihe iya kabiri izahura na Tanzania yabaye iya mbere mu itsinda ry’u Rwanda. Amakipe abiri azagera ku mukino wa nyuma ni yo azabona itike yo gukina CAN 2021 izabera muri Maroc muri Werurwe umwaka utaha.

U Rwanda rwasezerewe rutarenze amatsinda ya CECAFA U-17 iri kubera i Rubavu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .