Amavubi na AS Kigali ni zo zemerewe gukomeza imyitozo n’amarushanwa

Yanditswe na Eric Tony Ukurikiyimfura
Kuya 15 Ukuboza 2020 saa 06:57
Yasuwe :
0 0

Amakipe y’Igihugu azitabira amarushanwa atandukanye na AS Kigali ihagarariye u Rwanda mu mikino Nyafurika ya CAF Confederation Cup ni yo yemerewe gukomeza imyitozo n’amarushanwa gusa mu mupira w’amaguru.

Inama y’Abaminisitiri yateranye ku wa Mbere tariki ya 14 Ukuboza 2020, iyobowe na Perezida wa Repubulika Paul Kagame, yemeje ko “Imikino ya Shampiyona y’Igihugu y’Umupira w’amaguru hamwe n’imyitozo y’abakinnyi birahagaritswe. Icyakora amakipe y’umupira w’amaguru ari mu marushanwa mpuzamahanga yo yemerewe gukomeza kuyitabira.”

Iki cyemezo cyaje nyuma y’iminsi itatu Minisiteri ya Siporo ihagaritse Shampiyona y’Icyiciro cya Mbere guhera ku wa 12 Ukuboza kubera ko hari ubwandu bwa COVID-19 bwagaragaye mu makipe amwe n’amwe arimo Rayon Sports yarwaje abakinnyi 14 ndetse yo na Rutsiro FC zahuye ku munsi wa mbere, zombi zikaba zarahise zishyirwa mu kato guhera tariki ya 4 Ukuboza 2020.

Ishyirahamwe ry’Umupira w’Amaguru mu Rwanda (FERWAFA) ryategetswe kwishyura amafaranga yose ajyanye no gupimisha abakinnyi n’abatoza bose bari bitabiriye imikino ya shampiyona mbere y’uko basubira mu miryango yabo bavuye mu mwiherero.

Shampiyona yahagaritswe mu gihe hari hamaze gukinwa iminsi itatu yayo, ariko imikino yari imaze gusubikwa ni umunani irimo ine yasubitswe kubera COVID-19, yagombaga gukinwa n’amakipe ya Rutsiro FC na Rayon Sports ku munsi wa kabiri n’uwa gatatu ndetse n’indi ine yari gukinwa n’amakipe ya APR FC na AS Kigali yari mu marushanwa Nyafurika.

Kuri ubu ikipe y’Igihugu y’Ingimbi, Amavubi U-17, iri mu irushanwa ryahuje amakipe atandatu yo mu bihugu bya Afurika y’Iburasirazuba no Hagati (CECAFA) i Rubavu, rigamije gushaka amakipe azabona itike yo gukina Igikombe cya Afurika cy’Abatarengeje imyaka 17 kizabera muri Maroc mu Werurwe 2021.

Mu iri rushanwa rizasozwa ku wa 22 Ukuboza 2020 u Rwanda ruri mu itsinda B, rwatangiye rutsindwa na Tanzania ibitego 3-1 mu gihe umukino wa nyuma mu itsinda ruzawukina na Djibouti ku wa Gatatu saa kumi n’imwe (17:00).

Ku rundi ruhande, mu gihe Shampiyona yahagaritswe, ikipe y’Igihugu nkuru (Amavubi) igomba kwitegura Igikombe cya Afurika gihuza abakinnyi bakina imbere mu bihugu byabo (CHAN 2020) kizabera muri Cameroun kuva tariki ya 16 Mutarama kugeza ku ya 7 Gashyantare 2021.

Muri iri rushanwa ryagombaga kuba muri Mata 2020, rigasubikwa n’icyorezo cya Coronavirus, u Rwanda ruzaba ruri mu itsinda C hamwe na Uganda, Maroc na Togo.

Indi kipe yemerewe gukomeza imyitozo n’amarushanwa ni AS Kigali ihagarariye Igihugu mu mikino Nyafurika y’amakipe ya CAF Confederation Cup, aho hagati ya tariki ya 22 n’iya 23 Ukuboza, izakira KCCA yo muri Uganda mu mukino ubanza uzabera i Kigali mu gihe uwo kwishyura uzabera i Kampala hagati ya tariki ya 5 n’iya 6 Mutarama 2021.

Mu ijonjora rya mbere, AS Kigali yasezereye Orapa United yo muri Botswana ku gitego cyo hanze, ni nyuma yo kuyitsinda 1-0 mu mukino wo kwishyura wabereye kuri Stade ya Kigali tariki ya 6 Ukuboza 2020.

Muri Mutarama 2021, ikipe y'Igihugu 'Amavubi' izitabira CHAN 2020 izabera muri Cameroun
U Rwanda rwabonye itike ya CHAN 2020 ubwo rwasezereraga Ethiopia mu Ukwakira 2019
AS Kigali izahura na KCCA yo muri Uganda nyuma yo gusezerera Orapa United muri CAF Confederation Cup
Amavubi U-17 ari muri CECAFA iri kubera i Rubavu guhera ku Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .