Amavubi n’ikipe ya Cap-Vert zageze i Kigali mu ndege imwe

Yanditswe na Eric Tony Ukurikiyimfura
Kuya 14 Ugushyingo 2020 saa 09:30
Yasuwe :
0 0

Ikipe y’Igihugu y’Umupira w’Amaguru ‘Amavubi’ yamaze kugera i Kigali, aho igiye kwitegura umukino w’umunsi wa kane wo mu itsinda F wo gushaka itike y’Igikombe cya Afurika cya 2021, uzayihuza n’iya Cap-Vert ku wa Kabiri.

Amavubi yaherukaga kunganya n’ikipe ya Cap-Vert ubusa ku busa mu mukino wabaye ku wa Kane, yageze i Kigali saa sita n’iminota 30 mu ijoro ryakeye, ni nyuma yo gukora urugendo rw’amasaha agera ku icyenda aturutse i Praia.

Ikipe y’Igihugu ya Cap-Vert na yo yazanye n’Amavubi mu ndege imwe yihariye ya RwandAir nk’uko amashyirahamwe y’umupira w’amaguru mu bihugu byombi yabyumvikanye.

Amakipe yombi yabanje gupimwa COVID-19 ubwo yari ageze i Kigali. Amavubi azakomeza kuba muri La Palisse Hotel i Nyamata mu gihe ikipe ya Cap-Vert izaba muri Portofino kugeza ku wa Kabiri tariki ya 17 ubwo hazaba umukino wo kwishyura.

Muri uru rugendo rugana mu Gikombe cya Afurika kizabera muri Cameroun mu 2022, u Rwanda ni urwa nyuma mu itsinda F n’inota rimwe mu mikino itatu mu gihe Cap-Vert ifite amanota atatu.

Cameroun biri kumwe mu itsinda, ni iya mbere n’amanota arindwi, ikurikiwe na Mozambique ifite amanota ane.

Ikipe ya Cap-Vert n'iy'u Rwanda zafashe indege imwe igana i Kigali
Abakinnyi ba Cap-Vert ku kibuga cy'indege
Abakinnyi b'Amavubi basohoka mu ndege ubwo bari bageze i Kigali
Indege ya RwandAir yihariye yajyanye Amavubi, ni na yo yazanye amakipe yombi
Abakinnyi b'Amavubi barimo Hakizimana Muhadjiri bapimwe COVID-19
U Rwanda na Cap-Vert byanganyije ubusa ku busa mu mukino wabaye ku wa Kane
Umwe mu bakinnyi ba Cap-Vert apimwa COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .