00:00:00 IGIHE NETWORK KN KINYARWANDA EN ENGLISH FR FRANCAIS

Amatariki y’imikino ya CAF Champions League na CAF Confederations Cup yavuguruwe

Yanditswe na Mugisha Christian
Kuya 27 June 2022 saa 07:33
Yasuwe :

Impuzamashyirahamwe y’Umupira w’Amaguru muri Afurika (CAF) yashyize ahagaragara gahunda ivuguruye y’igihembwe cy’imikino cya 2022/23 harimo n’amakuru ajyanye n’urutonde rw’ibihugu byemerewe guhagararirwa n’amakipe abiri mu marushanwa ya CAF Chamipons League na CAF Confederations Cup.

Komite ishinzwe gutegura amarushanwa ya CAF, yakoze impinduka ku bijyanye n’igihembwe cy’imikino gitaha zirimo kwandikisha amakipe, amatariki mashya y’amarushanwa, kwiyandikisha kw’abakinnyi n’ibindi.

Mu itangazo ryasohowe na CAF rigaragaza urutonde rw’amashyirahamwe y’umupira w’amaguru 12 akomeye ku rwego rw’igihugu yemerewe guhagararirwa n’amakipe abiri muri buri rushanwa.

Ni ibihugu birimo Algerie, Angola, RD Congo, Misiri, Guinea, Libye, Maroc, Nigeria, Afurika y’Epfo, Sudani, Tanzania, Tunisie.

Muri iyi mikino abasimbura batanu bazaba bemewe kuri buri ruhande naho kuri buri mukino ku ntebe y’abasimbura hazaba hemerewe kugaragaraho abakinnyi icyenda ndetse buri kipe yemerewe kwandikisha abakinnyi 40 aho kuba 30.

Amakipe yamerewe kwandikisha abakinnyi hagati ya tariki ya mbere n’iya 15 Kanama 2022.

Uko imikino iteganyijwe

Icyiciro cya mbere cy’imikino yo gukuranamo kugira ngo haboneke ikipe zijya mu matsinda giteganijwe hagati ya tariki 9 na 18 Nzeri mu 2022 na ho icyiciro cya kabiri cy’iyi mikino giteganijwe hagati ya tariki 7 na 16 Ukwakira 2022.

Imikino y’amatsinda iteganijwe gutangira umwaka utaha kuva tariki ya 10 Gashyantare mu 2023 kugeza ku ya 2 Mata 2023.

Imikino ya ¼ cy’irangiza iteganijwe gutangira ya tariki ya 21 igasozwa tariki ya 30 Mata 2023, naho iya ½ cy’irangiza iteganijwe hagati ya tariki 12 na 21 Gicurasi 2023. Imikino ya nyuma izakinwa hagati ya tariki ebyri na 11 Kamena 2023.

APR FC yegukanye igikombe cya shampiyona cya 2022 niyo izaserukira igihugu mu mikino ya CAF Champions League mu gihe hategerejwe izatsinda hagati yayo na As Kigali ku mukino wa nyuma w’igikombe cy’amahoro ngo hamenyekane izahagararira u Rwanda mu mikino ya CAF Confederations Cup.

Ikipe ya APR FC ni yo izahagararira u Rwanda mu mikino ya CAF Champions League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .