Amatariki mashya y’amarushanwa ya CAF arimo CHAN 2020 izitabirwa n’u Rwanda

Yanditswe na Eric Tony Ukurikiyimfura
Kuya 11 Nzeri 2020 saa 11:57
Yasuwe :
0 0

Mu gihe bwa mbere, Igikombe cya Afurika gihuza abakinnyi bakina imbere mu bihugu byabo (CHAN 2020) cyari giteganyijwe kuba kuva hagati ya tariki ya 4 n’iya 25 Mata uyu mwaka, kuri ubu hashyizweho amatariki mashya kizaberaho mu 2021.

Inama yahuje Komite Nyobozi ya CAF hifashishijwe ikoranabuhanga ku wa Kane, yemeje ko CHAN 2020 izabera muri Cameroun hagati ya tariki ya 16 Mutarama n’iya 7 Gashyantare 2021.

U Rwanda ni kimwe mu bihugu 16 bizitabira iri rushanwa ndetse ruri mu itsinda C hamwe na Maroc, Uganda na Togo.

CAF kandi yemeje ko CHAN 2022 izabera muri Algérie, yimuriwe mu 2023.

Amatariki y’amarushanwa Nyafurika y’amakipe yasubitswe

Kugeza ubu ntiharasozwa amarushanwa Nyafurika y’umwaka w’imikino wa 2019/20, yahagaritswe n’icyorezo cya COVID-19 muri Werurwe ubwo yari ageze muri ½.

Byari biteganyijwe ko imikino ya Champions League izasubukurwa hagati ya tariki ya 25 n’iya 26 Nzeri haba imikino ibanza ya ½ muri Maroc hagati ya Zamalek-Raja Casablanca na Waydad Casablanca- Al Ahly mu gihe iyo kwishyura yari kubera mu Misiri hagati ya tariki ya 2 n’iya 3 Ukwakira 2020.

Umukino wa nyuma wari uteganyijwe hagati ya tariki ya 16 n’iya 17 Ukwakira, ukabera ku kibuga cyihariye mu gihe haba hari ikipe yo muri Maroc n’iyo mu Misiri zawugezeho cyangwa se ukabera muri kimwe muri ibyo bihugu byombi mu gihe amakipe yo mu gihugu kimwe ariyo yaba yageze ku mukino wa nyuma.

Hemejwe ko imikino ya ½ izaba hagati tariki ya 17 n’iya 18 Ukwakira haba imikino ibanza, iyo kwishyura ibe hagati ya tariki ya 23 n’iya 24 Ukwakira mu gihe umukino wa nyuma uzaba ku wa 6 Ugushyingo 2020.

Muri CAF Confederation Cup, irushanwa rizasorezwa muri Maroc; aho tariki ya 22 Nzeri, hagombaga kuba imikino ibiri ya ½; Pyramids yo mu Misiri ikina na Horoya yo muri Guinée mu gihe RS Berkane na HUSA zo muri Maroc zari guhurira mu wundi mukino.

Umukino wa nyuma uzabera kuri Stade Prince Moulay Abdellah y’i Rabat, wari uteganyijwe ku wa 27 Nzeri 2020.

Byemejwe ko imikino ya ½ izaba ku wa 19 no ku wa 20 Ukwakira mu gihe umukino wa nyuma uzaba ku wa 25 Ukwakira 2020.

Igikombe cya Afurika cy’Abagore kizaba mu 2022; Champions League yabo iremezwa

CAF yemeje ko Igikombe cya Afurika cy’Abagore cya 2022 kizaba muri Nyakanga mu gihugu kitaramenyekana.

Uyu mwanzuro wafashwe nyuma y’uko icya 2020 cyakuweho burundu kubera icyorezo cya Coronavirus ndetse kikaba cyizasimbuzwa irushanwa rya CAF Champions League rizatangira mu mwaka utaha wa 2021.

Ku nshuro yaryo ya mbere, iri rushanwa rya CAF Women Champions League rizitabirwa n’amakipe umunani ahagarariye uduce twa Afurika, azagabanywa mu matsinda abiri.

Ikipe y'Igihugu 'Amavubi' izakina CHAN 2020 yamaze kwimurirwa mu ntangiriro za 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .