Amarangamutima n’ibikabyo? Uko biba byifashe iyo abanyamakuru bogeza umupira kuri radio (Video)

Yanditswe na Eric Tony Ukurikiyimfura
Kuya 20 Ugushyingo 2019 saa 10:42
Yasuwe :
0 0

Hari byinshi abantu bibaza ku banyamakuru bogeza imipira, uko biba bimeze muri studio za radio no ku magambo abanyamakuru bavuga akenshi aba yuje gusetsa n’ibyo bamwe bita uturingushyo cyangwa ibikabyo. Hari n’abibaza uko umuyamakuru yitwara iyo yogeza umukino urimo ikipe afana cyangwa akunda.

IGIHE yasuye abanyamakuru ba City Radio ikorera mu Mujyi wa Kigali ubwo bogezaga imikino ya Shampiyona y’u Bwongereza (Premier League), batuganiriza uko bitwara mu gihe cy’umukino ndetse n’imbogamizi bahura nazo.

Hari ku mukino Bournemouth FC yatsinzemo Manchester United mu ntangiro z’uku kwezi.

Dushime Jean Népo yabwiye IGIHE ko uburyo abanyamakuru bogezamo igitego bisaba ubuhanga bwo kumenya uko uzamura ijwi no kwizigama umwuka kugira ngo umare umwanya munini uvuga kandi udasaraye.

Ati ”Iyo ugiye kogeza igitego umenya aho uhera, hari uburyo usa n’uhereye hasi ukazamuka gato gato ukagera hejuru ku buryo uvuga uti ’njyewe igitego ndifuza kucyogeza amasegonda aya n’aya kandi mbigereho. Hari abibwira ko byoroshye, ariko babigerageza bagahita basarara cyangwa ntibabikore igihe kirekire.”

“Ni tekiniki, uba ufite aho uhera, uburyo uzamura umwuka, uburyo uwucunga, ku buryo unasoza ukaba wahita ukomerezaho ubwira abantu inzira binyuzemo ngo igitego kiboneke. Hari igihe umuntu yumva uvuze igitego akibaza ese ni nde ugitsinze, giturutse kuri nde, ni nde umuhaye umupira.”

Dushime avuga ko icya mbere Abanyamakuru bogeza imipira birinda ari ukugira amarangamutima mu gihe bari mu kazi nubwo na bo baba bafite amakipe bafana cyangwa bakunda.

Ati “Tuba twarakuze tubikunda, tujya kureba imipira, dufite amakipe twakundaga ariko ibyo bintu urabyirinda kuko hari igihe umuntu yaba akumva uri kogeza, yaryohewe, yakumva utangiye kogeza nabi ikipe biri gukina akavuga ati koko uyu muntu ashobora kuba afana iyi kipe, yabibihije.”

“ Hari igihe ikipe ufana cyangwa ukunda itsindwa, ukabyogeza cyane umuntu akagira ngo itsinze ni yo ukunda. Witandukanya n’amarangamutima yawe.”

Kalisa Bruno Taifa avuga ko mbere y’uko umukino utangira, bafata umwanya uhagije wo gutegura umukino, bakarebera hamwe byinshi byerekeranye n’amakipe agiye gukina ndetse bakaganiriza n’abafana b’impande zombi.

Ati ”Iyo hari umukino, tubanza gufata umwanya tukaganira n’abafana tukabaha umwanya, amakipe yabo aba agiye gukina tuba tugomba kubaha umwanya bakagira icyo bavuga. Iyo ibi birangiye uba wamaze no gutegura ibijyanye n’amakipe agiye gukina uburyo yagiye ahura, imikino amaze gukina, uburyo yagiye atsindana, ibitego yatsindanye, byose ugenda ubireba kugira ngo abantu babimenye.”

Taifa avuga ko nta munyamakuru ushobora gukora ikosa ryo kujya mu mukino atafashe umwanya uhagije wo kuwitegura akareba byinshi bivugwa ku makipe agiye kogeza.

Ati ”Ntabwo ushobora kuza ako kanya ngo uze kuri micro uje kuvuga umukino. Ayo aba ari amakosa. Uba ugomba kubanza gutegura buri kintu cyose ukagishyira ku murongo, ni byo abafana baba bashaka, nibyo biryoha, hari n’abantu baba batabizi.”

“Ibyo byose iyo birangiye mureba uko amakipe yombi ahagaze, abavunitse, abahari, abari bukine, abatari bukine mugakora igereranya kugeza mutangiye umukino muwurimo koko.”

Niyonizeye Craig Jules avuga ko imbogamizi abogeza imipira bahura nazo atari nyinshi, ariko hari abadakunda umupira usanga batabyishimira bagashaka kubaca intege, bavuga ko bavuza induru ndetse bagasakuriza abantu.

Ati ”Ibi ni ibintu umuntu akora kuko abikunze, utabikunze ntabwo wapfa kubikora ngo ubishobore. Abantu benshi bibaza niba tutabogama. Umuntu ashobora kuza akaba yakubwira nabi kuko yumva ko ikipe ye uyanga, akaba yaguhamagara akabikubwira. Ikindi ni abadakunda umupira bakubwira bati ni gute umusore nkawe cyangwa umugabo nkawe yirirwa asakuza, uvuza induru ngo urogeza?”

Niyonizeye avuga ko kogeza bisaba gushyiramo uturingushyo bamwe bafata nk’ibikabyo, kugira ngo abantu ntibarambirwe gukurikira umupira ndetse barusheho gukunda Radio bari kumva.

Ati ”Iyo turi kuvuga dushyiramo utuntu tw’uturingushyo kugira ngo umuntu uri kumva umupira yumve ko aho hantu adashobora kuhavana urushinge. Ushyiramo utwo tuntu kuko ni Radio z’ubucuruzi nk’uko nabivugaga ku buryo n’umuntu runaka yavuga ngo iyi Radio abantu barayumva, na we ukizera ko bakumva koko.”

“Ikindi ni uko tuba duhanganye n’abandi bakora nk’ibyo dukora, tugomba gukora ikintu gituma umuntu akomeza kutwumva, ntabwo ari ibikabyo ahubwo ni ugutuma umuntu atarambirwa kukumva.”

Hari abogeza imikino bibereye ku kibuga ndetse n’abifashisha amashusho ya Televiziyo mu rwego rwo kugeza ku babakurikiye ibiri kubera ku kibuga.

Kalisa Bruno Taifa muri studio za City Radio ubwo we na bagenzi be bogezaga umupira wa Premier League
Dushime Jean Népo avuga ko kogeza bisaba ubuhanga no kumenya uko witwara mu gihe hari ikipe ukunda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza