Amakipe y’abagore yasabye FERWAFA kuyarenganura akajya ahembwa kimwe nk’ay’abagabo

Yanditswe na Eric Tony Ukurikiyimfura
Kuya 5 Mutarama 2021 saa 01:43
Yasuwe :
0 0

Amakipe y’abagore yasabye Ishyirahamwe ry’Umupira w’Amaguru mu Rwanda ko yajya ahembwa kimwe nk’ay’abagabo mu marushanwa atandukanye yitabira arimo Shampiyona n’ibindi bikombe akinira.

Iki ni kimwe mu byagarutsweho mu Nama y’Inteko Rusange idasanzwe ya FERWAFA yabaye ku wa 3 Mutarama 2021, yemeje ingengo y’imari ya 2021.

Teddy Gacinya uyobora AS Kigali WFC yabajije impamvu amakipe y’abagore ahabwa igihembo gito ugereranyije n’ay’abagabo kandi aba yakinnye amarushanwa amwe, avuga ko babibona nk’akarengane no kutubahiriza ihame ry’uburinganire.

Yagize ati “Hari akarengane hari no kutaba uburinganire hagati y’abagabo n’abagore, aho tubona ko abagabo babona igihembo kingana na miliyoni 21 Frw, abagore uko bakinnye, ikipe ya mbere ihabwa miliyoni 1 Frw, bakina mu kibuga kimwe, bakina iminota ingana, bafite ibibazo bingana.”

Mu kumusubiza, Umunyamabanga Mukuru wa FERWAFA, Uwayezu François Régis, yavuze ko uku gusumbana kw’ibihembo hagati y’amakipe y’abagabo n’ay’abagore biterwa n’ibyo aba yashoye.

Ati “Ushobora gusanga miliyoni 2 Frw ikipe yo mu bagore yahawe, uko mbyumva, ari nyinshi kurusha miliyoni 25 Frw zahawe ikipe y’abagabo mu Cyiciro cya Mbere. Biterwa n’imibare kuko bijyana no kureba ngo uyu yashyizemo angahe.”

“Turebye mu bitabo by’amakonti, ingengo y’imari y’amakipe y’abagabo mu Cyiciro cya Mbere ukareba ikoresha menshi mu bagabo n’ikoresha menshi mu bagore, wabona ko bitandukanye.”

Yavuze ko mu rwego rwo gukemura iki kibazo ari ugushaka ubushobozi amakipe yose akazamurirwa ibihembo.

Ati “Icyo twakora ni ugushaka ubushobozi. N’abari kuri miliyoni 25 Frw hari abavuga ko ari make. Tuyazamure. Kuyanganya byasaba ko n’ibyinjira bingana kuko nk’uyu munsi Icyiciro cya Mbere mu bagabo niba hazaboneka umuterankunga akazana amafaranga, si ko bizagenda mu bagore, ariko twese twumva ko umupira w’abagore ukwiye gutezwa imbere.”

“Mu buryo bw’inkunga, amafaranga ajya mu mupira w’abagore ni yo menshi ugereranyije n’ajya mu bagabo.“

Mu mwaka ushize wa 2020, FERWAFA yari yateganyije ko ikipe izatwara Shampiyona y’Icyiciro cya Mbere mu bagabo (yabaye APR FC) izahabwa miliyoni 25 Frw mu gihe iyari kugitwara mu bagore yari guhabwa miliyoni 5 Frw.

Mu cyiciro cya Kabiri, iyatwaye igikombe mu bagabo (Gorilla FC) yagenewe miliyoni 5 Frw mu gihe iyari kugitwara mu bagore mu Cyiciro cya Kabiri, yari guhabwa miliyoni 3 Frw.

Uku gusumbana mu bihembo bigaragara mu yandi marushanwa nka Super Cup, aho ikipe yari gutwara iki gikombe mu bagabo yari guhabwa miliyoni 5 Frw naho mu bagore igahabwa miliyoni 3 Frw.

Mu Irushanwa ry’Ubutwari 2020 ryasojwe ku wa 1 Gashyantare, APR FC yahawe igikombe giherekejwe na miliyoni 6 Frw nyuma yo kuba iya mbere.

Police FC yabaye iya kabiri, yahawe miliyoni 3 Frw, Kiyovu Sports ya gatatu ihabwa miliyoni 2 Frw mu gihe Mukura Victory Sports ya kane, yahawe miliyoni 1 Frw.

Mu bagore, Scandinavia WFC yabaye iya imbere, ihabwa igikombe giherekejwe na miliyoni 2 Frw mu gihe AS Kigali WFC yabaye iya kabiri yahawe miliyoni 1 Frw.

Umupira w’abagore usanzwe ugira amafaranga yihariye ugenerwa n’Ishyirahamwe ry’Umupira w’Amaguru ku Isi (FIFA). Mu mwaka ushize, amakipe y’abagore mu Rwanda yagenewe hafi miliyoni 500 Frw mu bihe bya COVID-19.

Umuyobozi wa FERWAFA, Rtd Brig Gen Sekamana Jean Damascène, yasabye ko iki kibazo cyazasuzumirwa mu mwiherero uzahuza abanyamuryango b’iri shyirahamwe mu minsi iri imbere.

Iradukunda Callixte wa AS Kigali WFC, ashyikirizwa sheki ya miliyoni 1 Frw nyuma yo kuba aba kabiri mu irushanwa ry'Ubutwari rya 2020
APR FC yatwaye irushanwa ry'Ubutwari 2020 mu bagabo, yahawe miliyoni 6 Frw
Teddy Gacinya uyobora AS Kigali WFC, yavuze ko amakipe y'abagore abona kudahembwa kimwe n'ay'abagabo ari akarengane no kudakurikiza uburinganire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .