Amakipe ane yamaze kubona itike ya 1/8 cya UEFA Champions League

Yanditswe na Eric Tony Ukurikiyimfura
Kuya 25 Ugushyingo 2020 saa 07:26
Yasuwe :
0 0

Imikino y’umunsi wa kane w’amatsinda ya UEFA Champions League yakomeje ku wa Kabiri, yasize amakipe ane arimo FC Barcelone, Juventus, Chelsea na FC Seville abonye itike yo gukomeza muri 1/8.

FC Barcelone yari yakiriwe na Dynamo Kyiv, yabigezeho nyuma yo kuyinyagira ibitego 4-0 mu itsinda G.

Nubwo yakinnye idafite Lionel Messi waruhukijwe kuri uyu mukino wabereye muri Ukraine, FC Barcelone y’umutoza Ronald Koeman yagaragaje urwego ruri hejuru, itsinda umukino wayo wa kane wikurikiranya mu irushanwa ry’uyu mwaka.

Nyuma y’igice cya mbere cyarangiye nta kipe irebye mu izamu ry’indi, Sergino Dest yafunguye amazamu ku munota wa 52 ubwo yari aherejwe umupira na Martin Braithwate wanatsinze ibindi bitego muri uyu mukino harimo n’icya penaliti mu gihe ikindi cyatsinzwe na Antoine Griezmann.

Kuri uyu mukino, umutoza Ronald Koeman yakoresheje ikipe y’abakinnyi bato mu babanje mu kibuga ugereranyije n’abakinnye indi mikino kuva ku wa 6 Ukuboza 2011.

Oscar Mingueza w’imyaka 21, yagiriwe icyizere cyo gukina umukino wa mbere mu mwanya wa Gerard Piqué wavunitse mu gihe kandi n’abarimo Francisco Trincao, Junior Firpo na Carles Alena bigaragaje.

Umunya-Denmark, Martin Braithwaite wari wabanje mu kibuga ku nshuro ya mbere, yagize umukino mwiza, atanga umupira wavuyemo igitego cya mbere mu gihe kandi yanatsinze icya kabiri nyuma yo guherezwa na Mingueza.

Gutsinda uyu mukino byafashije FC Barcelone kugira amanota 12 mu mikino ine, ibona itike yo gukomeza muri 1/8 mu gihe hasigaye indi mikino ibiri.

Muri iri tsinda G, Barcelone izazamukana na Juventus, yo yatsinze Frencvaros ibitego 2-1, ikagira amanota icyenda mu gihe andi makipe yo muri iri tsinda afite inota rimwe.

Igitego Cristiano Ronaldo yatsindiye Juventus cyari icya 70 mu mikino ya Champions League yakiniye mu rugo, aho abinganya na Lionel Messi.

Andi makipe abiri yabonye itike ya 1/8 ni ayo mu itsinda E, aho Chelsea yatsinze Rennes ibitego 2-1, ikayobora itsinda n’amanota 10 mu gihe na Seville yatsinze FC Krasnodar 2-1 ikagira amanota 10.

Uko amakipe yatsinda ku wa Kabiri

Itsinda E

  • Rennes 1-2 Chelsea
  • FC Krasnodar 1-2 FC Seville

Itsinda F

  • Borussia Dortmund 3-0 Club Brugge
  • Lazio 3-1 Zenit St Petersburg

Itsinda G

  • Dynamo Kyiv 0-4 FC Barcelone
  • Juventus 2-1 Frencvaros

Itsinda H

  • Manchester United 4-1 Istanbul Basaksehir
  • Paris Saint-Germain 1-0 RB Leipzig
Sergino Dest yafunguye amazamu ku ruhande rwa FC Barcelone
Illia Zabarnyi na Vitaliy Mykolenko bahanganiye na Philippe Coutinho wa FC Barcelone
Martin Braithwaite ahanganiye umupira na Illia Zabarnyi
Martin Braithwaite atsinda igitego kuri penaliti
Umunyezamu Heorhiy Bushchan yitegereza Martin Braithwaite wateraga umupira n'umutwe
Francisco Trincao agerageza kwambura umupira Carlos Maria De Pena Bonino
Antoine Griezmann ashimirwa na Sergino Dest nyuma yo gutsinda igitego cya kane
FC Barcelone ni imwe mu makipe ane yabonye itike ya 1/8 ku wa Kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .