Amakipe ane arimo Kiyovu Sports na Bugesera FC yahawe ibikoresho na SG Sports

Yanditswe na Eric Tony Ukurikiyimfura
Kuya 31 Ukwakira 2019 saa 02:39
Yasuwe :
0 0

Amakipe ane yo mu Rwanda arimo Kiyovu Sports na Bugesera FC yishimiye kwambikwa na kompanyi icuruza ibikoresho bya siporo “SG Sports” yo muri Tanzania, yatangiye gufasha amakipe yo mu Rwanda mu mupira w’amaguru kubona ibikoresho mu buryo bworoshye.

SG Sports kuri ubu iri gukorana n’amakipe ane yo mu Rwanda ari yo Musanze FC, Bugesera FC, AS Muhanga na Kiyovu Sports.

Kuri uyu wa Kane ni bwo SG Sports yashyikirije aya makipe bimwe mu bikoresho birimo imyambaro y’ikipe yo gukorana imyitozo, imyambaro y’abafana n’ibindi, mu muhango wabereye kuri Onomo Hotel.

Uyu muhango witabiriwe n’umunyamabanga w’ikipe ya Bugesera FC, Karenzi Sam, umubitsi w’ikipe ya AS Muhanga, Shema Olivier na Perezida w’agateganyo wa Kiyovu Sports, Bushayija Léonard.

Umuyobozi mukuru wa SG Sports, Simon Sanga, yavuze ko bamaze imyaka itatu bakora ibikorwa nk’ibi muri Tanzania, aho uyu mwaka w’imikino biyemeje kwagura ibikorwa byabo, batangira gukorana n’amakipe ane yo mu Rwanda.

Ati” Twahoraga dukangurira amakipe y’iwacu kutugana kuko tuzi ubushobozi bwabo, tukabakorera imyenda ku giciro gito. Birumvikana biragoye ko babona umuterankunga nka Adidas cyangwa undi, haracyari akazi kanini ko gukorwa ngo bagere kuri urwo rwego”.

“Twe icyo dushaka ni ukubambika bagasa neza kandi iyo usa neza n’abaterankunga baragusanga kuko imyenda yawe abafana bayigura ku bwinshi”.

Uyu muyobozi avuga ko mu byo baha amakipe ari imyambaro y’abakinnyi ndetse n’ibindi bikoresho ku giciro cyiza ndetse ko bagomba no gushakira abakunzi b’ikipe imyambaro isa n’iy’abakinnyi kandi na yo ku giciro cyoroheye abafana. Iyi myenda y’abafana ikaba na yo ifite ubwiza nk’ubw’imyambaro y’abakinnyi.

Ubusanzwe abakunzi b’ikipe baba bakwiye kujya kureba umukino wayo bambaye imyenda isa n’iy’abakinnyi gusa rimwe na rimwe imyenda yasaga nk’aho ihenze ari nabyo bituma abakunzi b’amakipe batabasha kuyigura.

Umunyamabanga wa Bugesera FC, Karenzi Sam, yavuze ko bishimiye kwambikwa na SG Sports kuko ubusanzwe wasanga imyambaro abakinnyi bari bujyane mu kibuga ari na yo bakoreshaga bishyushya.

Ati “Bamwe bazaga bakabasobanurira ariko imikorere ugasanga ntisobanutse, impamvu twakoranye na SG Sports ni uko bihutisha ibikorwa kandi amafaranga akaza nyuma. Batubwiye ko batuzanira imyenda tukazabishyura nyuma.”

“Ubu turambara neza. Bizeye ibikoresho byabo kuko babiguhaye utishyuye ushobora gusanga atari byiza ntubishyure. Urebye amafaranga tuzabaha ni nka ½ cy’ayo twaguraga iyo twari dusanzwe twambara.”

Simon Sanga yavuze ko ubundi amakipe aba akwiye gukora ibikorwa bituma abona amafaranga kandi mu buryo burambye, atanga urugero rwo muri Tanzania aho ikipe ya Simba SC iyo yakinnye hafi y’abafana bayo bose baba bambaye umwambaro w’ikipe.

Yavuze ko ibi bikwiye no kuba umuco mu Rwanda amakipe akagira uburyo acuruza imyambaro y’ikipe kuko rimwe na rimwe gutegereza amafaranga y’abafana binjira kuri Sitade bigoye kuko ikipe iyo itarimo kubona umusaruro mwiza abafana badashobora kuza kuri Sitade ariko ko iyo bamaze kugura wa mwambaro amafaranga aba yaramaze kwinjira.

Simon Sanga yavuze ko SG Sports ishaka gufasha amakipe yo mu Rwanda kwiyubaka mu bushobozi binyuze mu bafana bayo
Umunyamabanga Mukuru wa Bugesera FC, Karenzi Sam, yavuze ko bishimiye imyambaro bahawe na SG Sports
Perezida w’agateganyo wa Kiyovu Sports, Bushayija Leonard yari yitabiriye iki gikorwa
Kiyovu Sports yashyikirijwe imyambaro yo gukorana imyitozo
Yahawe kandi n’amatiriningi azajya yambarwa n’abakinnyi n’abandi bakozi b’ikipe
Bugesera FC ni imwe mu makipe ane yo mu Rwanda yatangiye gukorana na SG Sports
AS Muhanga yahawe imyambaro 500 y’abafana n'indi myambaro y’abakinnyi
Itiriningi ya Musanze FC
Umwambaro wa Musanze FC wakozwe na SG Sports
Nyuma y’imyambaro y’abakinnyi, amakipe azashyikirizwa n’iy’abafana

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza