00:00:00 IGIHE NETWORK KN KINYARWANDA EN ENGLISH FR FRANCAIS

Amakipe ane agiye guhatanira miliyoni 14 Frw muri ‘Made in Rwanda Cup 2022’

Yanditswe na Byiringiro Osée Elvis
Kuya 6 Ukwakira 2022 saa 10:01
Yasuwe :

Amasaha arabarirwa ku ntoki ngo Irushanwa ryiswe ‘Made in Rwanda Cup 2022’ ritangire aho rizahuza amakipe ane arimo Rayon Sports, Kiyovu Sports, Mukura Victory Sports et Loisirs na Musanze FC.

Iri rushanwa rizatangira ku wa Gatanu, tariki ya 7 Ukwakira 2022, rizakinirwa kuri Stade ya Kigali i Nyamirambo.

Umukino wa mbere uzahuza Kiyovu sports na Mukura VS saa Kumi mu gihe uwa kabiri uzahuza Rayon Sports na Musanze FC saa Moya n’Igice.

Amakipe azitwara neza ni yo azahurira ku mukino wa nyuma uteganyijwe ku Cyumweru, tariki ya 9 Ukwakira 2022.

‘Made in Rwanda Cup 2022’ ni irushanwa ryateguwe n’Ishyirahamwe ry’Umupira w’Amaguru mu Rwanda, Ferwafa n’Ikigo cy’Igihugu gitsura Ubuziranenge, RSB. Rigamije kumenyekanisha ibikorerwa mu Rwanda no gukangurira abaturarwanda kureba ko byujuje ubuziranenge.

Mu kiganiro n’itangazamakuru cyabaye kuri uyu wa Kane, tariki 6 Ukwakira 2022, Umuyobozi wa RSB, Murenzi Raymond, yashimangiye ko intego ya ‘Made in Rwanda Cup 2022’ ari ukumenyekanisha ibikorerwa mu Rwanda.

Yagize ati “Aya marushanwa agamije guteza imbere ibikorerwa mu Rwanda ndetse no kwizihiza ukwezi kwahariwe ubuziranenge.’’

Yakomeje avuga ko nubwo ari intangiriro, iri rushanwa rizaba ngarukamwaka.

Ati “Turifuza kugira irushanwa ngarukamwaka ndetse no kuzamura umubare w’amakipe aryitabira rikagera kuri menshi.”

Umunyamabanga w’Ishyirahamwe ry’Umupira w’Amaguru mu Rwanda, Ferwafa, Muhire Henry, yavuze ko iri rushanwa rizongerera amakipe urwego rw’imikino.

Yagize ati “Aya marushanwa azafasha amakipe gukina imikino myinshi ndetse no kongera ubushobozi bw’abakinnyi.”

Iri rushanwa ryari kuzakinwa n’amakipe yabaye aya mbere umwaka ushize ariko APR FC ya mbere yikuyemo ku mpamvu zayo bwite.

AS Kigali yabaye iya gatatu umwaka ushize yo iri mu marushanwa Nyafurika, CAF Confederation Cup aho izahura na Al Nasr yo muri Libya ku wa Gatandatu, tariki 8 Ukwakira 2022 kuri Stade Mpuzamahanga ya Huye.

Ikipe izaba iya mbere izahembwa miliyoni 5 Frw, iya kabiri ifate miliyoni 4 Frw, iya gatatu ni miliyoni 3 Frw mu gihe iya kane izahembwa miliyoni 2 Frw.

Kuri ubu amatike yageze ku isoko, Uyishaka ayigura akanze *939#. Itike imwe iguhesha uburenganzira bwo kureba imikino ibiri iteganyijwe buri munsi.

Itike ya make yashyizwe ku 2000 Frw ahasanzwe, 5.000 Frw ahatwikiriye mu gihe VIP ari 20.000 Frw.

Umukino wa mbere muri Made in Rwanda Cup 2022 uzahuza Kiyovu Sports na Mukura VS
Uzakurikirwa n'uzahuza Rayon Sports na Musanze FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .