Amagaju FC yakuwe mu irushanwa rya playoffs kubera uburangare bwatumye abakinnyi 11 bandura COVID-19

Yanditswe na IGIHE
Kuya 11 Ugushyingo 2020 saa 02:41
Yasuwe :
0 0

Komite Nyobozi ya FERWAFA yahanishije ikipe ya AMAGAJU FC kuvanwa mu irushanwa rya Playoffs riteganyijwe gutangira ku wa 13 Ugushyingo 2020, nyuma yo guhamwa n’uburangare bwatumye abakinnyi 11 bayo bandura icyorezo cya COVID-19.

Mu mibare yatangajwe na Minisiteri y’Ubuzima tariki ya 5 Ugushyingo, yavuze ko mu Rwanda habonetse ubwandu bushya 18 burimo ubw’abantu 12 bagaragaye mu Karere ka Nyamagabe, umwe w’i Kigali, babiri b’i Gatsibo na batatu b’i Nyagatare. Ubuyobozi bw’Ikipe y’Umupira w’Amaguru ya Amagaju FC, bwemeje ko muri abo bantu 12 babonetse i Nyamagabe harimo abakinnyi bayo 11.

Ku munsi wakurikiyeho, iyi kipe yandikiye FERWAFA iyisaba ko imikino yayo ya Playoffs yo gushaka amakipe azamuka mu cyiciro cya mbere, yasubikwa kuko yari isigaranye umubare udahagije w’abakinnyi.

Gusa mu nama ya Komite Nyobozi yateranye kuri uyu wa Gatatu tariki ya 11 Werurwe, Ferwafa yasanze muri raporo Amagaju FC yatanze, yaravuze ko "hari umukinnyi witwa Murindwa Evariste waje nyuma y’abandi kandi akaba yarahuye n’abandi bakinnyi bari mu mwiherero ibisubizo by’ibipimo bya COVID-19 yafashwe bitarasohoka. Ibi bikaba byaratumye abakinnyi 11 bandura COVID-19."

Yakomeje ati "Imaze gusesengura raporo yanyu, igasanga ikipe mubereye umuyobozi yaragize uburangare mu ishyirwa mu bikorwa ry’amabwiriza yo kurwanya ikwirakwira rya COVID-19, yafashe umwanzuro ko ikipe ya Amagaju FC ihanishijwe kuvanwa mu irushanwa rya Playoffs."

Ku wa 11 Ukwakira nibwo abakinnyi n’abakozi 30 b’Amagaju FC bapimwe COVID-19 mu gikorwa cyabereye i Nyamagabe.

Iyi kipe yari yabaye iya mbere yo mu cyiciro cya Kabiri ipimishije abakinnyi bayo ndetse nyuma y’iminsi mike ikaba yarahise itangira umwiherero.

Ingingo ya 11 y’amategeko ya FERWAFA agenga amarushanwa ya Playoffs ivuga ko igihe ikipe yagira abakinnyi barenga icyenda banduye Coronavirus, umukino usubikwa, Komisiyo y’amarushanwa ikazafata icyemezo gikwiriye.

Vision FC yari guhura n’Amagaju FC, izakomeza muri ½ idakinnye.

Amagaju FC yahanishijwe kuvanwa mu irushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .