Al Ahly yateye intambwe igana ku gikombe cya cyenda cya CAF Champions League isezereye Wydad (Amafoto)

Yanditswe na Eric Tony Ukurikiyimfura
Kuya 24 Ukwakira 2020 saa 08:30
Yasuwe :
0 0

Al Ahly yo mu Misiri yaraye isezereye Wydad Casablanca yo muri Maroc ku bitego 5-1, itera intambwe igana ku gikombe cya cyenda cya CAF Champions League.

Iyi kipe yo mu Misiri yabigezeho nyuma yo gutsinda ibitego 3-1 mu mukino wo kwishyura wabereye i Cairo ku wa Gatanu.

Marwan Mohsen yafunguye amazamu ku ruhande rwa Al Ahly nyuma y’iminota irindwi umukino utangiye, nyuma yo kuroba umunyezamu Ahmed Reda.

Iki gitego cyabanjwe kwangwa n’umusifuzi, agaragaza ko habayeho kurarira, ariko nyuma yo kwitabaza ikoranabuhanga rya VAR, hemezwa ko nta kurarira kwabayeho.

Wyadad yabonye uburyo bwiza bwo kwishyura ku munota wa 22, ariko Umunye-Congo Kasengu Kazadi wari uhawe umupira n’umukinnyi wa Al Ahly, awutera hanze.

Umunya-Nigeria Junior Ajayi yashoboraga gutsinda igitego cya kabiri ku ruhande rw’amashitani atukura, ariko agorwa n’umunyezamu Reda.

Nyuma y’akanya gato, Al Ahly yatsindiwe igitego cya kabiri na Hussin Elshahat, yizera gusoza igice cya mbere igeze ku giteranyo cy’ibitego 4-0 nyuma y’ibitego 2-0 byari byabonetse mu mukino ubanza.

Mu gice cya kabiri, Al Ahly yakomeje kugaragaza urwego rwo hejuru ndetse bitanga umusaruro ku munota wa 60, ubwo Yasser Ibrahim yatsindaga igitego cya gatatu ku mupira yateresheje umutwe.

Zouheir El Moutaraji wagiye mu kibuga asimbura, ni we watsinze igitego cy’impozamarira cya Wydad Casablanca, cyabonetse ku munota wa 82.

Ku mukino wa nyuma uteganyijwe ku wa Gatanu tariki ya 6 Ugushyingo, Al Ahly izahura n’ikipe izakomeza hagati ya Zamalek SC na Raja Casablanca.

Umukino ubanza wabereye muri Maroc, warangiye Zamalek yo mu Misiri itsinze igitego 1-0. Umukino wo kwishyura wimuriwe tariki ya 1 Ugushyingo nyuma y’uko abakinnyi umunani ba Raja basanganywe COVID-19 nyuma y’umukino ubanza.

Al Ahly imaze kwegukana CAF Champions League inshuro umunani, ariko igikombe iheruka yagitwaye mu 2013.

Francy Kazadi Kasengu ahanganiye umupira na Aliou Dieng wa Al Ahly
Yahya Attilat Allah agerageza gukura umupira kuri Marwan Mohsen
Marwan Mohsen atsinda igitego cya mbere cya Al Ahly mu mukino wabaye ku wa Gatanu
Marwan Mohsen yishimira igitego
Abakinnyi ba Al Ahly bishimira igitego muri uyu mukino wabereye mu muhezo kubera COVID-19
Wydad Casablanca yatsinzwe ibitego bibiri mu gice cya mbere, icyizere cyo kwishyura kiragabanuka
Al Ahly imaze imikino 17 idatsindirwa mu rugo
Abakinnyi ba Wydad Casablanca basohoka mu kibuga nyuma yo gusezererwa
Abakinnyi baguranye imyambaro ubwo umukino wari urangiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .