Mu mpera z’imikino ibanza ya Shampiyona ni bwo amakipe menshi yifuje uyu mukinnyi. Mu yamurambagije harimo Rayon Sports FC, Kiyovu Sports ndetse na AS Kigali.

Umuyobozi wa Kiyovu Sports Ltd ari na yo ibarizwamo Kiyovu Sports Company, Mvukiyehe Juvénal, we yavuze ko iri soko ry’igura n’igurisha ryo muri Mutarama 2023, Kiyovu Sports izongeramo abakinnyi babiri, ashimangira ko iyi kipe yifuza Djibrine Akuki wa Mukura VS.

Mu gihe barimo bisuganya banakemura ibibazo biri mu ikipe, uyu Munya-Nigeria yahise ahindukira ajya kwiganirira na AS Kigali. Mu bigaragara ntabwo ibiganiro byigeze bigenda nabi, kuko uyu musore w’imyaka 22 yatangiye gukorana na bagenzi be ba AS Kigali imyitozo.

Djibrine yari asigaranye amezi atandatu mu masezerano ye na Mukura VS, azwiho gukina akura imipira inyuma ayishyira ba rutahizamu ndetse akananyuzamo agatsinda ibitego. Yarambagijwe n’iyi kipe yo mu Mujyi wa Kigali nk’uzasimbura Niyonzima Haruna babisikanye ajya muri Al Ta’awon SC yo muri Libya.

Uyu Munya-Cameroun yasinyishijwe na AS Kigali yari ihagarariwe na Perezida wayo, Shema Fabrice, kuri uyu wa Kane, tariki ya 19 Mutarama 2023, ahabwa amasezerano y’imyaka ibiri iri imbere.

Amakuru agera kuri IGIHE aremeza ko uyu mukinnyi yatanzweho miliyoni 16 Frw kugira ngo asohoke muri Mukura VS.

Amafoto: Mu mwambaro mushya wa AS Kigali, Aboubakar Djibrine Akuki wakiniraga Mukura Victory Sports yerekanywe nk’umukinnyi mushya w’iyi Kipe y’Abanyamujyi mu myaka ibiri iri imbere. pic.twitter.com/7DvLq4KkGS

— IGIHE Sports (@IGIHESports) January 19, 2023

AS Kigali yasubukuye imyitozo ku wa Gatatu, tariki ya 4 Mutarama, yitegura imikino yo kwishyura ya Shampiyona iteganyijwe gutangira ku wa 20 Mutarama 2023.

AS Kigali yasoje imikino ibanza iri ku mwanya wa mbere aho inganya amanota 30 na Kiyovu Sports. Izasubukura ikina na Marines FC mu mukino uzabera kuri Stade ya Bugesera ku wa Gatandatu, tariki ya 21 Mutarama 2023.

AS Kigali yaguze rutahizamu Aboubakar Djibrine Akuki wakiniraga Mukura Victory Sports. Yahise atangira imyitozo aho yakoranye na bagenzi be ku wa Kane tariki 19 Mutarama 2023 kuri Stade ya Kicukiro. pic.twitter.com/Q0XHhsMTRN

— IGIHE Sports (@IGIHESports) January 19, 2023

Perezida wa AS Kigali, Shema Fabrice na Aboubakar Djibrine Akuki bashyira umukono ku masezerano azatuma uyu mukinnyi akinira ikipe y'Abanyamujyi mu myaka ibiri iri imbere

Perezida wa AS Kigali, Shema Fabrice na Aboubakar Djibrine Akuki nyuma yo gushyira umukono ku masezerano

Djibrine Akuki yahawe kwambara nimero umunani yari ifitwe na Kapiteni wa AS Kigali, Niyonzima Haruna babisikanye ajya muri Al Ta’awon SC yo muri Libya

Nyuma yo gusinya amasezerano muri AS Kigali, Djibrine Akuki yafashe ifoto ari kumwe na Perezida w'Ikipe y'Abanyamujyi, Shema Fabrice [wambaye amadarubindi]; Team Manager wayo, Bayingana Innocent n'Umuyobozi ushinzwe Itangazamakuru n'Itumanaho muri AS Kigali, Kankindi Anne-Lise

Djibrine Akuki yakiniraga Mukura Victory Sports

Amafoto: AS Kigali