Ajax yabonye intsinzi y’amateka muri Shampiyona y’u Buholandi ku bitego 13-0

Yanditswe na Eric Tony Ukurikiyimfura
Kuya 25 Ukwakira 2020 saa 10:56
Yasuwe :
0 0

Ikipe ya Ajax yaciye agahigo ko gutsinda ibitego byinshi mu mukino umwe wa Shampiyona y’Icyiciro cya Mbere mu Buholandi, Eredivisie, yihaniza VVV- Venlo y’abakinnyi 10 ku bitego 13-0 mu mukino wabaye ku wa Gatandatu.

Ajax yaherukaga gutsindwa na Liverpool igitego 1-0 mu mukino wa Champions League wabaye ku wa Gatatu, yakuyeho agahigo yari yarashyizeho mu 1972 ubwo yatsindaga Vitesse ibitego 12-1.

Lassina Traoré w’imyaka 19, yatsinze ibitego bitanu muri uyu mukino, Jürgen Ekkelenkamp w’imyaka 20 na Klaas-Jan Huntelaar w’imyaka 37, bombi batsinda ibitego bibiri kuri buri umwe.

Dusan Tadić, Antony, Daley Blind na Lisandro Martinez batsinze ibindi bitego byabonetse muri uyu mukino.

VVV- Venlo yasigaye ari abakinnyi 10 mu kibuga guhera ku munota wa 51 ubwo myugariro Christian Kum w’imyaka 35, yahabwaga ikarita itukura mu gihe ikipe ye yari yamaze gutsindwa ibitego 4-0.

Umunya-Burkina Faso, Traoré w’imyaka19, yabaye umukinnyi wa mbere utsinze ibitego byinshi mu mukino umwe wo mu Cyiciro cya Mbere kuva bikozwe na Donyell Malen, na we watsinze ibitego bitanu ubwo PSV akinira yatsindaga Vitesse muri Nzeri 2019.

Yabaye kandi umukinnyi wa mbere wa Ajax utsinze ibitego bitanu mu mukino wa Eredivisie kuva Marco van Basten atsinze bitandatu mu 1895 mu gihe kandi ari we mukinnyi watanze imipira itatu ivamo ibindi bitego kuri bagenzi be bo muri Ajax kuva bikozwe na Frenkie de Jong mu 2017.

Gusa, Traoré yabuze ibitego bibiri kugira ngo agere ku gahigo ko gutsinda ibitego byinshi mu mukino umwe wa Eredivisie, kashyizweho na Afonso Alves watsindiye Heerenveen ibitego birindwi ikina na Heracles mu Ukwakira 2007.

Intsinzi zikomeye zabonetse mu mateka ya Shampiyona ya Eredivisie

  1. VVV-Venlo 0-13 Ajax (24/10/2020)
  2. Ajax 12-1 Vitesse (19/05/1972)
  3. DOS Utrecht 10-0 SHS (14/12/1958)
  4. Feyenoord 10-0 NAC Breda (08/12/1963)
  5. PSV 10-0 Go Ahead Eagles (13/10/1973)
  6. PSV 10-0 Volendam (18/04/1998)
  7. PSV 10-0 Feyenoord (24/10/2010)

Intsinzi zikomeye Ajax imaze kubona mu marushanwa atandukanye

  1. Ajax (Europa League) 14-0 Differdange
  2. VVV Venlo 0-13 Ajax (Eredivisie)
  3. WHC Wezep 1-14 Ajax (KNVB Cup)
  4. Ajax (Eredivisie) 12-1 Vitesse
  5. Ajax (KNVB Cup) 10-0 Rapiditas
  6. Ajax (Champions League) 10-0 Amonia Nicosia
Lassina Traoré w’imyaka 19 yatsinze ibitego bitanu muri uyu mukino
Umunya-Burkina Faso, Traoré, yatanze kandi imipira itatu yavuyemo ibindi bitego byatsinzwe na bagenzi be
Daley Blind yishimira igitego yatsinze ku wa Gatandatu
Antony na Dusan Tadić na bo babonye izamu muri uyu mukino
Myugariro, Christian Kum, yahawe ikarita itukura muri uyu mukino
Ajax yaciye agahigo ko gutsinda ibitego byinshi mu mukino umwe wa Shampiyona ya Eredivisie

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .