APR FC na Pyramids bazahurira kuri Stade Amahoro mu mukino ubanza w’iyi mikino nyafurika, uteganyijwe kuri uyu wa Gatandatu tariki ya 14 Nzeri 2024 mu gihe uwo kwishyura uzahita ukurikiraho mu Misiri mu Cyumweru gitaha.

Uyu mukino uzasifurwa n’abasifuzi bakomoka muri Ghana, barangajwe imbere na Daniel Nii Laryea uzaba ari mu kibuga hagati yungirijwe na Kwasi Acheampong Brobbey na Seth Abletor bazaba bari mu mpande na Charles Benle Bulu uzaba ari uwa kane.

Ubwo ikipe ya APR FC yasezereraga AZAM FC, abakinnyi bari bahawe amadorali 500 buri umwe, gusa ku mukino wa Pyramids ubuyobozi bwemeye agera kuri Miliyoni enye mu mafaranga y’u Rwanda, ngo iyi kipe y’ingabo z’igihugu ibe yagera mu matsinda y’imikino ya CAF ku nshuro ya mbere.

Nyuma ya gusezerera AZAM FC, APR FC yakinnye imikino ibiri ya gicuti yatsinzemo Marines 2-1 ndetse na Mukura VS ibitego 3-2.

Iyi kipe itegereje abakinnyi 10 barimo abakina imikino y’amakipe y’ibihugu barimo umunani bari kumwe n’Amavubi, Pavelh Ndzila waraye ukiniye Congo muri Uganda umukino batsinzwemo 2-0 na Mamadou Sy uri bube ari kumwe na Mauritania mu mukino bafitanye na Cap Vert kuri uyu wa Kabiri Saa Tatu.

Ibiciro byo kwinjira kuri uyu mukino bigabanyije mu byiciro bitandatu, aho ahasanzwe hari mu byiciro bibiri, hasi no hejuru ni 2000 Frw, ku waguze itike kare ariko ku munsi w’umukino bikazaba ari 3000 Frw hejuru hasanzwe na 4000 Frw hasi hasanzwe.

VIP ni ibihumbi 10 Frw n’ibihumbi 20 Frw ku munsi wa nyuma, VVIP ni 30 Frw na 40 Frw umukino uri hafi gutangira. Hari kandi ibyiciro bizwi nka ‘Executive Seat’ aho ari ibihumbi 100 Frw bihoraho na ‘Executive Box’ igura ibihumbi 900 Frw.

APR FC yari yasezerewe na Pyramids muri iki cyiciro umwaka ushize ku giteranyo cy'ibitego 6-1

APR FC iheruka gukinira kuri Stade Amahoro itsinda AZAM ibitego 2-0

Ubuyobozi bwa APR FC bwazamuye agahimbazamusyi bwageneraga abakinnyi

Ikipe ya APR FC imaze iminsi ikora imyitozo ikomeye yitegura Pyramids yo mu Misiri