Mu kigariro yatanze cyanyuze ku mbuga nkoranyambaga z’ikipe, yagaragaje ko ababajwe n’umusaruro mubi uri kugaragara ariko hari ubutumwa bageneye abakinnyi ko bagomba kwisubiraho.

Ati “Turabanza kubihanganisha mbere na mbere kubera umukino twatsinzwe ari kuri bo [abakinnyi], abayobozi ndetse no ku bafana n’abandi bose bashinzwe iyi kipe. Ni ukubereka ko umusaruro twabonye utari ushimishije, tunabakangurira ko bagerageza ibishoboka byose bakareba ko batanga umusaruro mwiza watuma wongera kubabanisha neza n’abafana kuko ni cyo baba babifuriza.”

“Umusaruro udashimishije mu mupira ubaho ariko tugomba gushyiramo ingufu ku buryo ubutaha twareba icyo twakora cyatuma ikipe yacu itsinda, yongera guhagarara neza, kuyibanisha neza n’abo bafana bose baba bashyigikiye ikipe.”

Nubwo yavuze atyo ariko yashimye umuhate abafana bagaragaje ubwo bakinaga na Police FC, bagashyigikira abakinnyi nubwo babatengushye ntibabaheshe igikombe.

Ati “Nabanza kubashimira kuba barabashije kuboneka ari benshi n’imifanire yabo, nshimira n’ubuyobozi bwabo muri rusange, byari bishimishije. Icyababajemo ni uko hajemo gutsindwa ariko imifanire yabo yari ku rwego rwo hejuru.

Yongeyeho ati “Twabasaba gukomeza gushyigikira ikipe kuko nta muntu utari nyir’ikipe. Buri wese ayifiteho ubushobozi, arayikunda haba mu buryo bw’imifanire, ubw’inkunga, mu buryo n’ubw’amasengesho, icyo tubasaba bakomeze bashyigikire ikipe, urayitererana, uyitereranire nde? Natwe nk’ubuyobozi n’abatoza icyo cyuho babonye twese twarabibonye kandi dufite uburyo tubiganira, dufite icyizere ko kizakosoka.”

Col. Karasira yanenze abafana bakoresheje imvugo idakwiye banenga umusaruro w’ikipe kandi bakanavuga ko amakosa yose ari we wayakoze, aho yemera ko bari mu kuri kuko ari we muyobozi wayo.

Yagize ati “Hari abo numva bavuga ngo ni njye wamuzanye [Umutoza], ariko ibintu byose ni njye ubibazwa yaba n’abakinnyi, nta hantu umuntu yabyigizayo nk’umuyobozi, umusaruro mwiza cyangwa mubi ugomba kubazwa njyewe, nta gitangaza kirimo.”

Yavuze ko “Hari igihe amarangamutima azamo rimwe na rimwe havamo n’imvugo itari nziza. Wenda bishoboka ko umusaruro ari mubi ariko gutukana ntabwo ari ikinyabupfura cy’Abanyarwanda. Kuba ari njye wamuzanye ni njye, ni njye wazanye abakinnyi kuko mbazwa byose aha mu ikipe. Ntaho twabicikira nk’ubuyobozi bw’ikipe.”

Yasoje avuga ko mu myitozo iri gukorwa hari kugaragara impinduka zizatuma ikipe itera imbere kandi ikaba yazatanga umusaruro mwiza mu mikino iri imbere.

Chairman wa APR FC yavuze ibi nyuma y’ibyagarutsweho na benshi nyuma y’umukino wa Super Cup, aho hari n’abavuze ko iyi kipe isigaye ibamo abahoze muri Kiyovu Sports na Rayon Sports barimo abanyamakuru, akaba ari na bo bagize uruhare mu kurambagiza abakinnyi bayo.

Mu kiganiro Urukiko rw’Ubujurire cya Fine FM cyo ku wa 13 Kanama ndetse n’icyatambutse ku rubuga rwa Instragram, Bruno Taifa wahoze agikoramo, yagize ati "Muri APR byabaye uruvangitirane, noneho ugakubitiraho n’abanyamakuru bahawe akazi [...]. Nagiye kumva numva ngo Mukasa yavuye muri Kiyovu [...] nyuma numva Aba-Rayon barimo barisuka, ndavuga nti rero birasaba kwitonda."

Ikipe ya APR FC irateganya gukinisha abakinnyi itarakoresha kugeza uyu munsi, ubwo izaba ihanganye na Azam FC yo muri Tanzania, mu mukino ubanza wa CAF Champions League uteganyijwe ku Cyumweru, tariki ya 18 Kanama 2024.

Chairman wa APR FC, Col Karasira Richard, yanenze abafana bakoresha imvugo irimo ibitutsi bagaragaza umusaruro mubi w'ikipe

Chairman wa APR FC, Col Karasira Richard, yagaragaje ko umutoza Darko Nović ari gukora ibishoboka byose ngo azabone umusaruro w'ikipe

Abafana ba APR FC bijejwe umusaruro mwiza mu mikino itaha