Aduda wafashije APR FC kubona Manishimwe Djabel arashaka kuyobora FKF ya Kenya

Yanditswe na Eric Tony Ukurikiyimfura
Kuya 16 Ukwakira 2019 saa 12:26
Yasuwe :
0 0

Umunyamabanga Mukuru wa Gor Mahia FC, Lordvick Aduda, wagize uruhare rukomeye mu gutuma APR FC igura Manishimwe Djabel wakiniraga Rayon Sports, yatangaje ko aziyamamariza kuyobora Ishyirahamwe ry’Umupira w’Amaguru muri Kenya (FKF).

Aduda ni izina ryamenyekanye cyane mu Rwanda nyuma y’uko agize uruhare rukomeye mu gutuma Rayon Sports irekura Manishimwe Djabel bivugwa ko agiye muri Gor Mahia, ariko bukeye bwaho akagaragara mu myambaro ya APR FC.

Ku wa 30 Kamena, Rayon Sports ibinyujije ku rubuga rwa Twitter, yatangaje ko yamaze kumvikana na Gor Mahia ku igurwa rya Manishimwe Djabel wari ugifite amasezerano y’umwaka umwe, ku bihumbi $30.

Nyuma y’umunsi umwe gusa, Manishimwe Djabel yatangiye imyitozo muri APR FC ku kibuga cya Kicukiro.

Kugeza n’uyu munsi, Ubuyobozi bwa APR FC bwemeza ko Manishimwe Djabel yaguzwe muri Gor Mahia.

Mu kiganiro yagiranye na Goal.com, Lordvick Aduda wari wahawe urupapuro rurekura Manishimwe Djabel, yahakanye amakuru yavugaga ko Gor Mahia yaguze uyu mukinnyi ukina hagati inyuma ya ba rutahizamu.

Ati” Icyabaye ni uko twumvikanye n’ikipe n’umukinnyi. Ntabwo twigeze tugera ku masezerano. Gor Mahia, dusinyisha abakinnyi habona, ntabwo twabihisha. Turabahamagara tukabibabwira mukanavugana na bo.”

Mu kiganiro yagiranye n’itangazamakuru nyuma yo kujya muri APR FC, Manishimwe Djabel yashinje Ubuyobozi bwa Rayon Sports kumubuza amahirwe yo kujya muri Gor Mahia.

Ati" Rayon Sports yashyize hanze ibyanjye na Gor Mahia bitararangira ni yo yabyishe, ubundi impamvu banshakaga cyane hari umukinnyi w’Umugande ukina ku mwanya wanjye bashakaga ko njya gusimbura we yashakaga kugenda ariko abyumvishe umuhagarariye aca inyuma ajya kuvugana na Gor Mahia bamwongerera amasezerano Umunyamabanga Mukuru atabizi akiri mu Rwanda."

Gor Mahia ngo yasabye Rayon Sports ko yabasubiza amafaranga igasubirana uyu mukinnyi cyangwa hakagira indi kipe imutwara, aho APR FC yabyumvise vuba maze ikegukana uyu musore.

Mu minsi ishize Umuyobozi wa Rayon Sports, Munyakazi Sadate, yabwiye IGIHE ko ibyabaye hagati ya Djabel n’Umunyamabanga Mukuru wa Gor Mahia byari amanyanga, ndetse yari yiyemeje kurega Lordvick Aduda.

Ati” Ni deal yajemo ubumafiya, ikintu nkita uko cyitwa. Ntabwo twari tuzi ko umuntu wo muri Gor Mahia yaza i Kigali aje gutekaho imitwe abantu cyangwa se umukinnyi wa Rayon Sports akabeshya aho agiye kujya. N’aho yagiye bakagombye kubitekerezaho.”

“Namwe murabyumva [ko ibyo Djabel yavuze] ko ari ikinyoma. Twafashe icyemezo nka Rayon Sports ngo turege uriya mugabo wa Gor Mahia [Aduda] kuko yatubeshye ariko yambwiye ko azaza kundeba tukavugana.”

Lordvick Aduda wigeze kuba Umunyamabanga Mukuru wa FKF kugeza mu 2012, yatangaje ko ashaka kuba Perezida wayo mu matora azaba tariki ya 7 Ukuboza 2019.

Nick Mwenda usanzwe uyobora iri Shyirahamwe ry’Umupira w’Amaguru na Moses Akaranga na bo bamaze kwemeza ko baziyamamaza.

Lordvick Aduda yaje i Kigali kumvikana na Rayon Sports, ayibwira ko Manishimwe Djabel agiye kujya muri Gor Mahia
Uburyo Manishimwe Djabel yerekeje muri APR FC byavugishije benshi
Lordvick Aduda agiye kwiyamamariza kuyobora Ishyirahamwe ry'Umupira w'Amaguru muri Kenya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza