Adil Mohammed, Nabyl na Hassan Haj Taieb bongerewe amasezerano yo gutoza APR FC

Yanditswe na Eric Tony Ukurikiyimfura
Kuya 22 Kamena 2020 saa 09:45
Yasuwe :
0 0

Umutoza mukuru wa APR FC, Adil Mohammed Erradi n’abandi babiri bakomoka mu gihugu kimwe; Naby Bekraoui umwungirije na Hassan Haj Taieb uhugura umutoza w’abanyezamu, bose bamaze kongererwa amasezerano yo gutoza ikipe y’ingabo mu gihe kiri imbere.

Amakuru yo kongera amasezerano ku mutoza mukuru, Adil Mohammed Erradi, yatangiye kuvugwa mu cyumweru gishize binyuze mu itangazamakuru ryo muri Maroc.

Adil Mohammed yagizwe umutoza mukuru wa APR FC mu mpeshyi ya 2019, asimbuye Umunya-Serbia Zlatko Krmpotić wari umaze ukwezi kumwe atandukanye n’ikipe y’ingabo.

Mu mwaka umwe w’amasezerano yari yahawe, Adil yafashije APR FC kwegukana igikombe cya shampiyona idatsinzwe, aho mu mikino 23 yakinwe, ikipe ye yatsinzemo 17, inganya itandatu. Iki gikombe cyiyongeraga ku Irushanwa ry’Ubutwari 2020, APR FC yegukanye muri Gashyantare uyu mwaka no kwitwara neza mu mikino ya gisirikare yabereye muri Kenya muri Kanama 2019.

Amakuru IGIHE yamenye ni uko Adil Mohammed Erradi w’imyaka 41, yahawe andi masezerano mashya y’imyaka ibiri kugira ngo akomeze gutoza APR FC izahagararira u Rwanda mu irushanwa rya CAF Champions League ya 2020/21 rishobora kuzatangira mu Ukwakira.

Bivugwa ko umushahara we na wo wongerewe ukava ku bihumbi 18€, kuri ubu ukaba uri hagati y’ibihumbi 20€ na 22€ (hafi miliyoni 23.5 Frw) ku kwezi.

Uretse umutoza mukuru, Nabyl Bekraoui umwungirije na we yongerewe amasezerano y’umwaka umwe mu gihe Hassan Haj Taieb wageze mu Rwanda muri Mutarama aje guhugura umutoza w’abanyezamu, Mugabo Alex, na we azamara andi mezi atatu mu Rwanda.

Mugabo Alex wabaye muri APR FC hagati ya 2015 na 2017, akaba yarayigarutsemo muri Nyakanga 2019, azakomeza gutoza abanyezamu bayo kuko yahawe amasezerano y’imyaka ibiri mu mpeshyi y’umwaka ushize.

Umutoza Adil Mohammed Erradi yongerewe amasezerano y'imyaka ibiri muri APR FC
Adil Mohammed na Nabyl Bekraoui umwungirije, ku kibuga cy'imyitozo cya APR FC i Shyorongi
Hassan Haj Taieb yongerewe andi mezi atatu yo guhugura umutoza w'abanyezamu ba APR FC, Mugabo Alex
APR FC izahagararira u Rwanda muri CAF Champions League ya 2020/21

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .