00:00:00 IGIHE NETWORK KN KINYARWANDA EN ENGLISH FR FRANCAIS

Abatoza bane barabyiganira mu muryango winjira muri Bugesera FC

Yanditswe na Ntare Julius
Kuya 24 Mutarama 2023 saa 07:12
Yasuwe :

Abatoza bane barimo Nshimiyimana Eric n’Umunya-Misiri, Ahmed Abdelrahman Adel, bari mu biganiro na Bugesera FC ishaka umusimbura wa Ndayiragije Étienne.

Bugesera FC yatandukanye n’Umutoza w’Umurundi Ndayiragije Étienne tariki 10 Mutarama 2023, ku bwumvikane hagati y’impande zombi, ubu iri gutozwa Mutarambirwa Djabir wari wungirije.

Iyi kipe iri ku mwanya wa 12 n’amanota 19, ikomeje kuganiriza abatoza batandukanye mu rwego rwo gushaka umusimbura wa Ndayiragije wakomezanya n’ikipe akayifasha kwitwara neza mu mikino isigaye.

Mu mazina akomeje kugarukwaho harimo irya Nshimiyimana Eric wasezerewe na AS Kigali nyuma yo gutsindwa na Rayon Sports tariki 18 Ukuboza 2021.

Uyu mugabo w’imyaka 50, yatoje Ikipe y’Igihugu Amavubi nk’Umutoza Mukuru ndetse n’Uwungirije, yanyuze muri APR FC, Kiyovu Sports na AS Kigali. Afite ubunararibonye kuko yakiniye Ikipe y’Igihugu hagati ya 1996 na 2004.

Irindi zina ni Gyslain Bienvenue Tchiamas, Umunye-Congo ufite ubwenegihugu bw’u Bufaransa watoje amakipe anyuranye nka Diables Noirs na Association Sportive Otôho y’iwabo muri Congo ndetse n’Ikipe y’Igihugu ya Repubulika ya Congo y’Abatarengeje imyaka 23 nk’Umutoza wungirije mu 2020.

Uyu mutoza w’imyaka 49 wari umunyezamu mu bihe bye agikina ruhago, yamenyekanye mu Rwanda ubwo yatozaga Gicumbi FC ariko baza gutandukana tariki 23 Ukuboza 2021 ayihesheje intsinzi imwe mu mikino ine yatoje.

Undi mutoza ni Umunya-Misiri Ahmed Abdelrahman Adel watoje amakipe yo mu Rwanda nka Musanze FC na Gasogi United.

Adel werekanywe nk’Umutoza wa Gasogi United tariki 18 Nyakanga 2022, yamaze amezi atatu n’iminsi 14 gusa muri iyi kipe kuko basheshe amasezerano tariki 31 Ukwakira 2022.

Mu mikino itandatu yayitoje, yatsinzemo itatu yahuyemo na Mukura VS, Bugesera FC na Police FC, anganya umwe.

Bisengimana Justin wahagaritswe na Espoir FC tariki 19 Ukuboza 2022 kubera umusaruro muke, na we ari mu batoza bane bari mu biganiro na Bugesera FC.

Bisengimana yerekanywe nk’umutoza wa Espoir FC tariki 28 Nyakanga 2022. Mu mikino 13 y’igice kibanza cya Shampiyona yatsinzemo umwe gusa wa Marines FC igitego 1-0 kuri Stade ya Rusizi, anganya ine, atsindwa icyenda.

Yayisize iri ku mwanya wa nyuma n’amanota arindwi n’umwenda w’ibitego 17.

Bisengimana si mushya muri Bugesera FC kuko yayitoje hagati ya Nyakanga n’Ugushyingo 2019.

Bugesera FC yasigaranye abahoze ari abungiriza ba Ndayiragije Étienne ari bo Mutarambirwa Djabir ndetse n’uwongera imbaraga Peter Otema.

Iyi kipe iri ku mwanya wa 12 n’amanota 19. Mu mikino 16 ya shampiyona, yatsinzemo itanu, inganya ine, itsindwa irindwi.

Umutoza Nshimiyimana Eric ari ku rutonde rw’abatoza bashobora gutoza Bugesera FC
Umunya-Misiri Abdelrahman Adel na we ari mu bahabwa amahirwe ko basimbura Ndayiragije Etienne muri Bugesera FC
Gyslain Bienvenue Tchiamas, Umunye-Congo ufite ubwenegihugu bw’u Bufaransa watoje imikino ine gusa muri Gicumbi FC na we ari kuri uru rutonde
Bisengimana Justin utarahiriwe n'amezi atanu muri Espoir FC ashobora gusubira muri Bugesera FC yahozemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .