Gasogi United iyoboye urutonde rwa Shampiyona, izahura na Rayon Sports itaratsinda umukino n’umwe dore ko n’uwo yari buhuriremo na APR FC wagizwe ikirarane kubera umukino iyi kipe y’ingabo z’igihugu izahuriramo na Pyramids mu majonjora ya CAF Champions league.

Ubuyobozi bw’iyi kipe bwatangaje ko bwatangiye gutegura ibi birori bizaba bidasanzwe muri ruhago y’u Rwanda dore ko aribwo bwa mbere aya makipe azaba ahuriye muri Stade Amahoro nshya nyuma yo kuvugururwa ikanazamurirwa ubushobozi n’urwego.

Aganira na IGIHE KNC uyobora Gasogi United yagize ati "Turifuza gutegura ibirori bizasigara mu mitwe y’Abanyarwanda muri rusange atari abakunzi ba ruhago gusa.”

“Twakoze ku buryo buri kimwe cyose kizaba ari cyiza kandi ari gishya ku muntu uzafata umwanya akaza muri Stade Amahoro gukurikira umukino wa Rayon Sports na Gasogi United. Abanyarwanda bazabona ibyo amaso yabo atari yabereka".

Bimwe mu bitegurwa gukorwa kuri uwo munsi harimo kuzana abashyushyarugamba (MC) babiri basanzwe bakunzwe mu rubyiruko rwa Kigali ariko bataba muri ruhago ndetse n’aba DJ bagezweho muri Kigali nka DJ Marnaud, DJ Sonia, DJ Crush na DJ Caspi.

Aha kandi, KNC akaba azazana televiziyo za rutura zireshya na metero zirenga eshatu zizashyirwa mu bice bitandukanye bya Stade ku buryo abazaza kureba uyu mukino bazabanza gukurikirana uwa APR FC na Pyramids wo kwishyura mu gihe bazanakurikirana ibirori bitandukanye bizaba binyuraho muri iki kibuga cyakira abagera ku bihumbi 45 bicaye neza.

Rayon Sports na Gasogi United zaherukaga guhurira muri Stade Amahoro muri shampiyona mu mukino wa mbere iyi kipe yakinnye mu cyiciro cya mbere ubwo amakipe yombi yanganyaga 0-0 nyuma bakongera guhura muri Shampiyona yo matsinda ya 2021 ubwo Rayon Sports yatsindaga igitego 1-0.

Miss at your Own Risk⚫️🟠 It will be more than Just a match! https://t.co/IRjKdt5FGJ pic.twitter.com/OsDRxsCZXi

— Gasogi United FC (@gasogi_united) September 11, 2024

Gahunda ni Tariki 21 zuku kwezi kwa Cyenda.
Amahoro Stadium is the Location 🍾, meet your Favorite DJ and experience the best Match.
Tuzakira ikipe ya Rayonsports. Tell a friend to tell a friend ⚽️
Twe Turi #Urubambyingwe🟠⚫️ pic.twitter.com/hIR4iHQu2c

— Gasogi United FC (@gasogi_united) September 11, 2024

Gasogi United izakira Rayon Sports ku munsi wa Kane wa Shampiyona

Ibitego bya Kabanda byari byafashije Gasogi gutsinda rayon Sports 2-1 mu mukino baheruka guhuriramo muri Shampiyona

Gasogi United iyoboye urutonde rwa Shampiyona nyuma yo gutsinda Marines FC

Abakunzi ba APR FC bazareba umukino wa Gasogi na Rayon Sports bazanashobora gukurikirana uw'ikipe yabo izaba iri guhuriramo na Pyramids mu Misiri