U Rwanda ruzabanza kwakirwa na Libya tariki ya 4 Nzeri mbere yo kwakira Nigeria kuri Stade Amahoro tariki ya 10 Nzeri 2024.

Ikipe y’Igihugu yatangiye umwiherero ku wa Mbere, yiganjemo abakinnyi bakina muri Shampiyona y’u Rwanda ariko mu minsi ibiri ishize hari abakinnyi bakina hanze bamaze kwiyongeramo.

Abahageze ni Mugisha Bonheur wa AS Marsa muri Tunisie, Gitego Arthur wa AFC Leopards muri Kenya, Manzi Thierry wa Al Ahli Tripoli muri Libya, Nshuti Innocent wa One Knoxville muri Leta Zunze Ubumwe za Amerika na Rubanguka Steve wa Al Nonjoom muri Arabie Saoudite.

Ni mu gihe umunyezamu Ntwari Fiacre ukinira Kaizer Chiefs yo muri Afurika y’Epfo ategerejwe i Kigali kuri uyu wa Kane.

Aba bakinnyi bose uko ari batandatu, bari mu 10 bakina hanze bari bitabajwe. Bane basigaye ari bo Bizimana Djihad ukina muri Ukraine, Imanishimwe Emmanuel ukina muri Chypre, Mutsinzi Ange ukina muri Azerbaijan na Kwizera Jojea ukina muri Leta Zunze Ubumwe za Amerika, bose bazahurira na bagenzi babo muri Libya.

Biteganyijwe ko Ikipe y’u Rwanda izahaguruka i Kigali ku wa Gatandatu, tariki ya 31 Kanama, saa Cyenda n’Igice.

Muri iyi mikino yo gushaka Itike y’Igikombe cya Afurika cya 2025, kizabera muri Maroc, u Rwanda ruri mu itsinda D hamwe na Nigeria, Libya ndetse na Bénin.

Rutahizamu Nshuti Innocent yakoranye imyitozo na bagenzi be ku wa Gatatu

Rubanguka Steve ukina mu kibuga hagati, na we yamaze kugera mu mwiherero w'Amavubi

Myugariro Manzi Thierry ukina muri Libya, ari muri batandatu bakina hanze bazahagurukana n'Amavubi agiye gukina i Tripoli

Abatoza b'Ikipe y'Igihugu; Frank Spittler Torsten, Jimmy Mulisa na Rwasamanzi Yves ku myitozo