00:00:00 IGIHE NETWORK KN KINYARWANDA EN ENGLISH FR FRANCAIS

Ibihe by’ingenzi byaranze uruzinduko abakinnyi ba Arsenal y’Abagore baherutsemo mu Rwanda

Yanditswe na Eric Tony Ukurikiyimfura
Kuya 26 Ukuboza 2022 saa 03:13
Yasuwe :

Abakinnyi bane bakinira Arsenal y’Abagore baherutse gusura u Rwanda, bareba ibikorwa bitandukanye birimo ibigaragaza ibyiza by’igihugu.

Aba bakinnyi ni myugariro w’Umunya-Écosse, Jen Beattie; rutahizamu w’Umunya-Australia, Caitlin Foord; Umunya-Irlande, Katie McCabe; ukina ku ruhande asatira izamu ndetse n’Umwongereza Jordan Nobbs ukina hagati.

Basuye u Rwanda muri Nyakanga, nyuma y’igihe gito basoje Shampiyona y’Icyiciro cya Mbere mu Bagore, Barclays FA Women’s Super League, aho babaye aba kabiri barushwa inota rimwe na Chelsea WFC yatwaye igikombe.

Babanje kuvuza ingoma za Kinyarwanda mbere yo gukina umukino wo Kumasha kuri One & Only Gorilla’s Nest aho banakoreye Yoga.

Ku wa 5 Nyakanga 2022, ni bwo aba bakinnyi basuye Pariki y’Igihugu y’Ibirunga icumbikiye ingagi zo mu misozi aho bagiye bitwaje inkoni zikoze mu buryo zigaragaza ingagi zirimbishijwe imitako gakondo.

Caitlin Jade Foord na Katie McCabe banyuze ku ruhande rumwe bari kumwe Daniel Lane wabaherekeje.

Bakigera muri Pariki y’Ibirunga, Katie McCabe yabajije Emmanuel wabayoboye izina ry’umuryango w’ingagi bagiye gusura ndetse n’umubare w’ingagi ziwugize.

Emmanuel yamusubije ati "Umuryango witwa Susa. Ufite abanyamuryango 21. Harimo ingagi ebyiri z’ingabo nkuru n’abana batanu b’ingagi barimo ifite amezi abiri. Iracyari ntoya cyane."

Jordan Nobbs na Jen Beattie bo binjiye muri Pariki y’Ibirunga banyuze ku rundi ruhande. Eugène wari kumwe na bo abayobora, yabajije umwe muri aba bakinnyi niba yafindura ibihingwa bari bagezeho, undi aramusubiza ati "Ni ibirayi". Bose bashimishijwe n’uko atanze igisubizo cy’ukuri mu gihe we yavuze ko atiyumvisha neza uburyo abikoze.

Bo basuye ingagi zo mu muryango wa Pablo. Jen yabajije Nobbs ati "Ese n’intoya ziba ari nini nkayo [indi ngagi bari babonye]?". Jordan Nobbs yahise aseka.

Aba bakinnyi bakomeje gutembere babona n’izindi ndetse bafata amafoto n’amashusho. Bavuze ko bagize inararibonye rya mbere ryiza muri uru ruzinduko basuyemo ingagi mu birunga.

Katie McCabe yagize ati "Murakoze cyane, birashoboka ko ari rwo rugendo rwacu rwiza dukoze mu buzima."

Jen Beattie we yagize ati "Kureba ingagi uzegereye byari byiza. Mwakoze cyane kuko twari dutuje nta kibazo dufite. Umuntu abonye amahirwe nk’aya ni byiza kuyabyaza umusaruro. Tugize inararibonye tutigeze tubona."

Batembereye kandi ku magare bareba ibyiza bitatse u Rwanda biri mu Majyaruguru, banasura Ikigo Ellen DeGeneres Campus kirengera urusobe rw’ibinyabuzima by’umwihariko ingagi zo mu Birunga.

Mbere yo gusoza uruzinduko rw’abo, abakinnyi bahuye n’abakobwa b’Abanyarwanda bakina umupira w’amaguru kuri Stade ya Kigali, babatoza uburyo bashobora kuzamura urwego rwabo bakavamo abanyamwuga.

Caitlin, Jen, Jordan na Katie biyongereye ku bandi benshi bo muri Arsenal basuye u Rwanda mu bihe bitandukanye. Abo barimo uwahoze ari myugariro w’iyi kipe, David Luiz n’Umuyobozi wayo wa Siporo, Eduardo César Daud Gaspar (Edu) wahageze mu Ugushyingo.

Mu 2018 ni bwo u Rwanda rwinjiye mu bufatanye na Arsenal yo muri Premier League, aho rwayibereye umuterankunga wa mbere ku maboko y’imipira, haba mu Ikipe Nkuru, iy’Abatarengeje imyaka 23 no mu Ikipe y’Abagore, amasezerano yaje no kongerwa mu 2021.

Abakinnyi bane bakinira Arsenal y'Abagore baherutse gusura u Rwanda /Ifoto: Newtimes

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .