Abakinnyi batatu b’Amavubi banduye COVID-19

Yanditswe na Eric Tony Ukurikiyimfura
Kuya 28 Ukuboza 2020 saa 09:10
Yasuwe :
0 0

Ikipe y’Igihugu ‘Amavubi’ iri mu mwiherero wo kwitegura imikino ya nyuma y’irushanwa rya CHAN 2020 rizabera muri Cameroun, yabonetsemo abantu bane banduye icyorezo cya COVID-19, barimo abakinnyi batatu n’ushinzwe ibikoresho.

Ikipe y’Igihugu igizwe n’abakinnyi bakina imbere mu gihugu, yatangiye umwiherero ku wa Gatatu w’icyumweru gishize n’abakinnyi 28 batarimo abo muri AS Kigali bari kwitegura umukino wa KCCA FC muri CAF Confederation Cup.

Amakuru dukesha Radio 10 avuga ko mu bipimo byafashwe abakinnyi n’abandi bakozi b’Amavubi mu cyumweru gishize, ibisubizo byabo byagaragaje ko hari bane banduye COVID-19.

Abanduye barimo myugariro na rutahizamu bombi bakinira Rayon Sports, rutahizamu wa APR FC ndetse n’umwe mu bashinzwe ibikoresho by’Ikipe y’Igihugu, aho kuri ubu bashyizwe ukwabo mu kato ndetse bazongera gupimwa nyuma y’icyumweru kimwe.

Amavubi azitabira CHAN 2020 izabera muri Cameroun hagati ya tariki ya 16 Mutarama n’iya 7 Gashyantare 2021, ari mu itsinda C hamwe na Uganda, Maroc na Togo.

Ikipe y’Igihugu irateganya gukina imikino ya gicuti mbere yo kwerekeza muri Cameroun, aho kugeza ubu ibihugu bivugwa birimo Namibia.

Ni ku nshuro ya gatatu yikurikiranya u Rwanda ruzaba rwitabiriye Shampiyona Nyafurika ihuza abakinnyi bakina imbere mu bihugu byabo (CHAN) dore ko rwayakiriye mu 2016 ndetse rukitabira ya 2018 muri Maroc.

U Rwanda rugiye gukina iri rushanwa ku nshuro ya kane mu nshuro esheshatu kuva ribaye bwa mbere mu 2009.

Si ubwa mbere COVID-19 ivuzwe mu makipe yo mu Rwanda dore ko Shampiyona y’Icyiciro cya Mbere yahagaritswe igeze ku munsi wa gatatu kubera ko hari amakipe yagaragayemo ubwandu. Mu mezi abiri ashize, abanduye bo muri Shampiyona y’Icyiciro cya Mbere n’icya Kabiri basaga 50.

Amakipe 12 yagaragayemo abarwayi ni Amagaju FC, Alpha FC, APR FC, AS Kigali, AS Muhanga, Etincelles FC, Kiyovu Sports, , Marines FC, Musanze FC, Rayon Sports, Rutsiro FC na Sunrise FC.

Amavubi akomeje kwitegura CHAN 2020 yagaragayemo bane banduye COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .