Ku makipe yo muri Premier League y’u Bwongereza aba ahanzwe amaso na benshi, yose hamwe yashoye miliyari 2,08£ mu kugura abakinnyi bashya muri iyi mpeshyi.

Gusa, aya mafaranga ni make ugereranyije na miliyari 2,44£ yakoreshejwe mu mwaka ushize. Ni mu gihe ayinjijwe n’aya makipe yo muri Premier League binyuze mu bakinnyi yagurishije angana na miliyari 1,45£.

Chelsea ni yo kipe yashoye menshi aho yatanze miliyoni 219,6£ aho agera ku gice cyayo yaguzwe Pedro Neto (miliyoni 54£) na João Felix (miliyoni 46,3£).

Andi makipe yakoresheje amafaranga menshi ni Manchester United (£205.9m), Brighton (£192m), Tottenham (£133.5m), West Ham (£132.5m), Aston Villa (£129.5m), Ipswich (£124m), Southampton (£108.3m) na Arsenal (£101.5m).

Amakipe yinjije amafaranga menshi ni Chelsea yabonye miliyoni 153.3£, Manchester City (miliyoni 146.9£ arimo miliyoni 82£ yaguzwe Julián Alvarez ajya muri Atlético Madrid, Aston Villa (£136.4m), Crystal Palace (£98.3m), Arsenal (£97.5m), Manchester United (£94.7m) na Wolves (£94m).

Ku rundi ruhande, Ipswich yazamutse uyu mwaka, ni yo kipe yinjije amafaranga make (£1m), ikurikiwe na Leicester (£30m), Southampton (£40.4m) na West Ham (£32.5m).

Abakinnyi batanzweho akayabo binjiye mu makipe ya Premier League ni Tottenham yaguze Dominic Solanke muri Bournemouth imutanzeho miliyoni 65£ na Leny Yoro watanzweho miliyoni 58.9£ avuye muri Lille ajya muri Manchester United.

Pedro Neto (wavuye muri Wolves ajya muri Chelsea kuri miliyoni 54£), Manuel Ugarte (Paris Saint-Germain- Manchester United, £50.7m), Amadou Onana (Everton- Aston Villa, £50m), João Felix (Atlético Madrid-Chelsea, £46.3m), Matthijs de Ligt (Bayern Munich -Manchester United, £42.7m) na Riccardo Calafiori (Bologna -Arsenal, £42m) na bo bari mu bakinnyi baguzwe menshi.

Southampton ni yo yaguze abakinnyi benshi (12) mu gihe Manchester City na Liverpool zaguze abakinnyi babiri gusa.

Mu bijyanye no kurekura abakinnyi burundu, Arsenal yatandukanye n’abakinnyi 31 naho Wolves irekura barindwi.

Ni bande bahinduye amakipe ku munota wa nyuma?

Nyuma yo kurekura Raheem Sterling watijwe umwaka umwe muri Arsenal, Chelsea yasinyishije Jadon Sancho wa Manchester United muri ubwo buryo.

Kubisikana kw’abakinnyi bombi byatumye isoko ryari kurangira saa Sita z’ijoro (z’i Kigali) ryongerwaho amasaha abiri kugira ngo ibyangombwa byose birangire.

Rutahizamu w’Umwongereza Ivan Toney wakiniraga Brentford, yerekeje muri Al-Ahli yo muri Arabie Saoudite atanzweho miliyoni 40£.

Mbere yo kwemerera Sancho kugenda, Manchester United yishyuye miliyoni 42,1 muri miliyoni 50,5£ ishobora kuzatanga ku Munya-Uruguay Manuel Ugarte wakiniraga Paris Saint-Germain.

Ugarte yabisikanye na Scott McTominay iyi kipe y’i Manchester yagurishije muri Napoli yo mu Butaliyani kuri miliyoni 25,7£.

Arsenal yagurishije Eddie Nketiah muri Crystal Palace mu mafaranga akabakaba miliyoni 30£, mu gihe Chelsea yananiwe gusinyisha Umunya-Nigeria Victor Osimhen ukinira Napoli.

Undi wasohotse muri Arsenal ni umunyezamu Aaron Ramsdale werekeje muri Southampton atanzweho miliyoni 25£.

Raheem Sterling yerekeje muri Arsenal atijwe na Chelsea mu gihe cy'umwaka umwe

Manuel Ugarte yasinyiye Manchester United

Eddie Nketiah wakiniraga Arsenal, yagiye muri Crystal Palace

Rutahizamu Ivan Toney yerekeje muri Arabie Saoudite

Dominic Solanke werekeje muri Spurs, ni we mukinnyi waguzwe amafaranga menshi n'ikipe yo muri Premier League

Jadon Sancho yerekeje muri Chelsea nk'intizanyo