Abakinnyi 14 bamaze kugaragaraho Coronavirus mu makipe ya Premier League

Yanditswe na Eric Tony Ukurikiyimfura
Kuya 19 Kanama 2020 saa 09:37
Yasuwe :
0 0

Abakinnyi 14 bo mu makipe 12 yamaze gutangira imyitozo yo kwitegura Shampiyona y’umwaka utaha w’imikino mu Bwongereza bamaze gusanganwa icyorezo cya COVID-19 giterwa na bwa Coronavirus.

Nyuma y’uko umwaka w’imikino wa 2019/20 usojwe ku wa 26 Nyakanga, biteganyijwe ko Premier League ya 2020/21, izatangira ku wa 12 Nzeri 2020.

Amakipe 12 yo mu Bwongereza yamaze gutangira imyitozo yo kwitegura umwaka utaha w’imikino, arimo Liverpool yatwaye igikombe cya Shampiyona iheruka.

Iyi kipe yagiye kwitegurira muri Autriche, imaze kugaragaramo umurwayi wa Coronavirus umwe muri iki cyumweru mu gihe amakipe arimo Manchester United, City, Chelsea na Wolves atarasubukura imyitozo bitewe n’imikino y’u Burayi yari afite.

Andi makipe yatangiye imyitozo ni Tottenham, Everton, Southampton, West Ham, Crystal Palace, Leicester, Newcastle, Sheffield United, Brighton na Leeds United yazamutse uyu mwaka.

West Bromwich Albion na Burnley zizagaruka mu myitozo ku wa Kane mu gihe bitaramenyekana igihe Aston Villa izatangirira nubwo kapiteni wayo, Jack Grealish, aherutse gusangiza amafoto kuri Instagram, ari kuva mu biruhuko.

Arsenal na Fulham na zo zageze kure mu irushanwa rya FA Cup, ntiziratangira imyitozo.

Ikinyamakuru The Telegraph cyatangaje ko kugeza ubu mu makipe yamaze gutangira imyitozo, hamaze kugaragara abarwayi ba Coronavirus 14.

Bivugwa ko amakipe afite ubwoba ko imibare ishobora kwiyongera bitewe n’uko abakinnyi benshi bagiye bagaragara bitabiriye ibirori bitandukanye mu biruhuko ndetse bakarenga ku mabwiriza yo kwirinda Coronavirus.

Nubwo umubare w’abamaze kwandura Coronavirus utaremezwa, urasa n’uri hejuru ugereranyije na 30 babonetse mu bipimo ibihumbi 35 byafashwe mu mushinga wo gusubukura Premier League mu mpera z’umwaka ushize w’imikino.

Biteganyijwe ko Shampiyona nisubukurwa, abakinnyi bazajya bapimwa inshuro imwe mu cyumweru aho kuba inshuro ebyiri mu cyumweru nk’uko byari bimeze hagati ya Gicurasi na Nyakanga.

Dele Alli wa Tottenham, James Madisson wa Leicester City na Jack Grealish wa Aston Villa baheruka mu biruhuko muri Ibiza
Ryan Fredericks (ibumoso), Mason Mount (wa kabiri ibumoso) na Declaren Rice (iburyo) bagaragaye mu biruhuko ku Cyirwa cyo mu Bugiriki cya Mykonos
Abakinnyi ba Chelsea: Christian Pulisic, Tammy Abraham na Fikayo Tomori muri Mykonos
Ben Chillwell na Danny Drinkwater bakinanye muri Leicester City bifotoza aho bari mu Bugiriki
Liverpool yatangiye imyitozo muri Autriche
Southampton nayo yatangiye kwitegura umwaka mushya w'imikino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .