00:00:00 IGIHE NETWORK KN KINYARWANDA EN ENGLISH FR FRANCAIS

Abafana ba Rayon Sports bifurije Perezida Kagame isabukuru y’amavuko (Amafoto)

Yanditswe na Ntare Julius
Kuya 23 Ukwakira 2022 saa 10:59
Yasuwe :

Abafana ba Rayon Sports bifurije Perezida Paul Kagame isabukuru y’imyaka 65 y’amavuko ku mukino bahuriyemo na Espoir FC kuri Stade ya Kigali i Nyamirambo ku Cyumweru, tariki ya 23 Ukwakira 2022.

Tariki ya 23 Ukwakira 2022 ni umunsi udasanzwe ku Banyarwanda n’inshuti zabo, kuko ari bwo bafatanya na Perezida Kagame kwizihiza isabukuru ye y’amavuko.

Muri uyu mwaka, Perezida Kagame yizihije isabukuru y’imyaka 65 amaze abonye izuba.

Mu kwifatanya na we, abafana ba Rayon Sports bamwifurije isabukuru nziza y’amavuko, bamushimira intambwe amaze guteza igihugu n’abagituye.

Ubwo umukino wahuje Rayon Sports na Espoir FC wari ugeze ku munota wa 65, abafana bahagurutse bifuriza Perezida Kagame isabukuru nziza y’amavuko.

Aba bafana baririmbaga bagira bati "Muzehe wacu. Turamukunda, turamwemera cyane. Isabukuru nziza y’amavuko.’’

Na nyuma y’umukino Rayon Sports yatsinzemo Espoir FC ibitego 3-0, ibirori byakomeje mu kwishimira isabukuru ya Perezida Kagame.

Perezida wa Rayon Sports, Uwayezu Jean Fidèle, yafatanyije n’abafana ba Rayon Sports mu kwizihiza isabukuru ya Perezida Kagame.

Yafashe ifoto ya Perezida Kagame yanditseho amagambo ari mu rurimi rw’Icyongereza agira ati "Isabukuru nziza y’amavuko nyakuhabwa Paul Kagame, Perezida wa Repubulika y’u Rwanda.’’

Abafana bamufashaga kuzamura amaboko ndetse bakoma amashyi n’impundu mu byishimo byinshi.

Nyuma yo kuyizengurutsa mu bafana, bamwe mu bayobozi ba Rayon Sports baje kuyifatiraho ifoto y’urwibutso.

Perezida Kagame yabonye izuba ku wa 23 Ukwakira 1957, avukira ku musozi wa Tambwe, ubu ni mu Karere ka Ruhango. Ni umuhererezi mu muryango w’abana batandatu, bavuka kuri Rutagambwa Deogratias na Rutagambwa Asteria.

Mu 1959, ubwo yari afite imyaka ibiri, umuryango wa Kagame wahungiye mu Majyaruguru y’Iburasirazuba bw’u Rwanda, aho wamaze imyaka ibiri mbere yo kwerekeza muri Uganda.

Kimwe n’abandi Banyarwanda benshi, ubuzima bwe bwo mu buto yabubaye mu buhunzi muri Uganda kuko ariho yize amashuri abanza n’ayisumbuye.

Perezida Kagame yayoboye urugamba rwo kubohora igihugu ndetse baza kubigeraho mu 1994, nyuma yo guhagarika Jenoside yakorewe Abatutsi.

Nyuma y’uru rugamba yahawe inshingano zitandukanye zirimo kuba Visi Perezida na Minisitiri w’Ingabo.

Ku wa 24 Werurwe 2000 ni bwo Paul Kagame yagizwe Perezida wa Repubulika muri Leta y’Inzibacyuho, asimbuye Pasteur Bizimungu wari umaze kwegura ndetse mu 2003 aza gutorerwa n’abaturage gukomeza izi nshingano.

Perezida wa Rayon Sports, Uwayezu Jean Fidèle, yafatanyije n'abafana b'iyi kipe mu kwizihiza isabukuru ya Perezida Kagame
Perezida Kagame yizihije isabukuru y'imyaka 65 amaze abonye izuba
Perezida wa Rayon Sports, Uwayezu Jean Fidèle yari afite akanyamuneza ubwo yatambagiranaga ifoto iriho ubutumwa bwifuriza Perezida Kagame isabukuru nziza y'amavuko
Perezida Kagame abinyujije kuri Minisitiri wa Siporo, Munyangaju Aurore Mimosa, yashimiye abafana ba Rayon Sports bamwifurije isabukuru nziza y'amavuko
Abafana ba Rayon Sports bifurije Perezida Kagame isabukuru y’amavuko
Perezida wa Rayon Sports, Uwayezu Jean Fidèle n'Umunyamabanga Mukuru wa Rayon Sports, Patrick Namenye
Aba bafana bifatanyije n'Umukuru w'Igihugu mu gusangira ibyishimo ku munsi we w'amavuko
Bari bitwaje ifoto iriho amagambo yifuriza Perezida Kagame isabukuru nziza y'amavuko

Amafoto: Ntare Julius

Byiringiro Ephter


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .