00:00:00 IGIHE NETWORK KN KINYARWANDA EN ENGLISH FR FRANCAIS

Muri Espoir FC 23 basanzwemo COVID-19, umukino urasubikwa

Yanditswe na Bukuru JC
Kuya 18 January 2022 saa 04:20
Yasuwe :

Umukino w’umunsi wa 13 wa Shampiyona wari guhuza Marines FC na Espoir FC kuri uyu wa Kabiri, wasubitswe nyuma y’uko 23 muri 29 bagize iyi kipe y’i Rusizi basanzwemo COVID-19.

Uyu mukino wari kubera kuri Stade Umuganda guhera saa Cyenda.

Ishyirahamwe ry’Umupira w’Amaguru mu Rwanda (FERWAFA) ryatangaje ko wasubitswe bitewe n’ubwandu bwa COVID-19, ariko ntihigeze hatangazwa umubare w’abanduye, gusa hemezwa ko abakinnyi bari badahagije.

Amabwiriza agenderwaho muri ibi bihe bya COVID-19 avuga ko ikipe igomba gukina mu gihe ifite nibura abakinnyi 16 barimo umunyezamu.

Amakuru IGIHE yamenye ni uko 23 muri 29 bagize Espoir FC ari bo basanzwemo iki cyorezo ndetse 11 bari bateganyijwe ko babanza mu kibuga, bose basanze barwaye.

Uyu mukino ni wo wa mbere usubitswe muri Shampiyona y’Icyiciro cya Mbere biturutse ku bwandu bwa COVID-19.

Nyuma y’imikino 12 imaze gukinwa, Espoir FC iri ku mwanya wa munani n’amanota 15 inganya na Marines FC yari kuyakira.

Kuva imikino isubukuwe tariki ya 15 Mutarama 2022, amakipe apimirwa hamwe ku kibuga amasaha abiri mbere y’umukino, bigakorwa ku buntu.

Icyakoze, na yo asabwa kwipimisha inshuro imwe mu gihe cy’imyitozo, akiyishyurira icyo kiguzi.

Abakinnyi n'abandi 23 ba Espoir FC basanzwemo COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .