Mashami Vincent yongerewe amasezerano yo gutoza Amavubi

Yanditswe na IGIHE
Kuya 16 Mutarama 2020 saa 03:03
Yasuwe :
0 0

Minisiteri ya Siporo yongereye Mashami Vincent amasezerano yo gukomeza gutoza Ikipe y’Igihugu Amavubi.

Amakuru yizewe agera kuri IGIHE ni uko Mashami yashyize umukono ku masezerano mashya yo gukomeza gutoza Amavubi kuri uyu wa Kane, tariki ya 16 Mutarama 2020.

Mashami agiye gukomeza gutoza Amavubi nubwo ibyo yasabwe ubwo yahabwaga amasezerano y’amezi atatu muri Kanama 2019, agasabwa amanota ane mu mikino ibiri atabigezeho.

Icyo gihe, Mashami yasabwe gufasha u Rwanda kugera mu ijonjora rya kabiri ryo gushaka itike y’Igikombe cy’Isi cya 2022 kizabera muri Qatar, abigeraho asezereye Seychelles ku bitego 10-0 muri Nzeri.

Yanasabwe kandi gufasha u Rwanda kugera mu mikino ya nyuma ya CHAN 2020 izabera muri Cameroun, na byo abigeraho asezereye Ethiopia ku bitego 2-1; mu gihe amanota ane yari yasabwe mu mikino ibiri yahuyemo na Mozambique na Cameroun mu gushaka itike ya CAN 2021, nta na rimwe yabonye.

Mashami Vincent yahawe amasezerano mashya nyuma y’amezi abiri n’igice asoje igihe cy’igeragezwa yahawe.

Ni icyemezo cyafashwe nyuma yo kubona raporo y’Ishyirahamwe ry’Umupira w’Amaguru, FERWAFA, ari nayo isanzwe ikoresha Mashami.

Mu nshingano ziri imbere ya Mashami harimo kwitabira imikino y’Igikombe cya Afurika cy’abakinnyi bakina imbere mu bihugu (CHAN) izabera muri Cameroun muri Mata 2020. Tombola yuko amakipe azahura iteganyijwe muri Gashyantare 2020.

Amavubi kuri uyu wa kabiri kandi aramenya itsinda azaba abarizwamo mu mikino yo gushaka itike y’Igikombe cy’Isi izabera muri Qatar, izatangira muri Werurwe 2020.

Iyi mikino nayitwaramo neza nibwo ashobora no guhabwa amasezerano y’igihe kirekire.

Mashami Vincent yahawe gutoza Amavubi makuru muri Kanama 2018; muri Kanama 2019 yongerewe amasezerano y’umwaka umwe nyuma y’ibiganiro byari bimaze iminsi bihuza FERWAFA n’iyari MINIPOC, icyo gihe hari hanifujwe ko hagarurwa Umwongereza Stephen Constantine wagiriye ibihe byiza mu Amavubi.

Mashami Vincent yongerewe amasezerano mu Ikipe y’Igihugu Amavubi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .