Mashami Vincent yongerewe amasezerano ku nshuro ya gatatu

Yanditswe na Eric Tony Ukurikiyimfura
Kuya 28 Gashyantare 2021 saa 09:54
Yasuwe :
0 0

Umutoza Mukuru w’Ikipe y’Igihugu, Amavubi, Mashami Vincent yongerewe amasezerano y’umwaka umwe, asabwa kwitwara neza mu mikino iri imbere irimo iyo gushaka itike y’Igikombe cya Afurika cya 2021 n’icy’Isi kizabera muri Qatar mu 2022.

Mashami Vincent utoza Ikipe y’Igihugu kuva muri Kanama 2018, n’ubundi ni we rukumbi watekerejweho kuri uyu mwanya.

Amasezerano y’umwaka umwe yari yasinye muri Gashyantare 2020, yarangiye muri uku kwezi.

Ku wa Gatatu w’iki cyumweru, Minisitiri wa Siporo, Munyangaju Aurore Mimosa, yari yatangaje ko "Bitarenze ku wa Gatanu, umutoza w’Ikipe y’Igihugu ’Amavubi’ azaba yatangajwe."

Ku wa Gatandatu, Umunyamabanga Mukuru w’Ishyirahamwe ry’Umupira w’Amaguru mu Rwanda (FERWAFA), Uwayezu François Régis, yabwiye IGIHE ko icyatumye umutoza atinda gutangazwa ari uko hari ibitarakemuka.

Yongeyeho ko "Nibirangira, aratangazwa [...] ku mbuga nkoranyambaga za FERWAFA."

Hari amakuru avuga ko Mashami Vincent yari yasabiwe na FERWAFA ukwezi kumwe, agatoza imikino ibiri isigaye mu gushaka itike ya CAN 2021 mu gihe hagishakwa undi mutoza, ariko we akaba yaranze ubwo busabe.

Umwe mu bo hafi y’uyu mutoza n’undi wo mu rwego rumwe mu zagize uruhare mu biganiro by’amasezerano ya Mashami Vincent, bombi bemeje ko byamaze kurangira.

Umwe yabwiye IGIHE ko "Yahawe amasezerano y’umwaka umwe. Bashobora kubitangaza uyu munsi [ku Cyumweru] cyangwa akazerekwa abanyamakuru ku wa Mbere."

Mu nshingano yahawe harimo kwitwara neza mu mikino iri imbere irimo iyo gushaka itike y’Igikombe cya Afurika cya 2021 n’icy’Isi kizabera muri Qatar mu 2022.

Mu kwezi gutaha, u Rwanda ruzakira Mozambique tariki ya 22 Werurwe mbere yo gusura Cameroun ku wa 30 Werurwe, hasozwa imikino yo mu itsinda F ryo gushaka itike ya CAN 2021 izabera muri Cameroun muri Mutarama 2022.

U Rwanda ruri ku mwanya wa nyuma n’amanota abiri. Itsinda riyobowe na Cameroun ifite amanota 10 mu gihe Cap-Vert na Mozambique zinganya amanota ane.

Imikino yo gushaka itike y’Igikombe cy’Isi cya 2022 izatangira muri Kamena, aho u Rwanda ruri mu itsinda E hamwe na Mali, Uganda na Kenya.

Ni ku nshuro ya gatatu Mashami Vincent yongerewe amasezerano mu Ikipe y’Igihugu

Bwa mbere yayahawe muri Kanama 2018 asimbuye Umudage Antoine Hey wari wagiye muri Mutarama uwo mwaka.

Muri Kanama 2019, yahawe amasezerano y’agateganyo, asabwa ko mu mezi atatu azafasha u Rwanda kubona itike ya CHAN 2020, gusezerera Seychelles mu rugendo rugana mu Gikombe cy’Isi kizabera muri Qatar mu 2022 no kubona amanota ane mu mikino ibiri ibanza yo gushaka itike ya CAN 2021.

Nyuma yo kugera kuri bimwe mu byo yasabwe nubwo yatsinzwe imikino ibiri ya Mozambique na Cameroun mu rugendo rwa CAN 2021, Mashami yongerewe amasezerano y’umwaka umwe muri Gashyantare 2020.

Umusaruro wa Mashami mu mwaka w’amasezerano urangiye

Muri Werurwe 2020 ni bwo Ikipe y’Igihugu yari gukina imikino ibiri yo gushaka itike y’Igikombe cya Afurika hamwe na Cap-Vert, muri Kamena igakina indi ibiri hamwe na Cameroun na Mozambique.

Gusa, ibiri ya mbere yimuriwe mu Ugushyingo kubera COVID-19 mu gihe indi ibiri isigaye izakinwa muri Werurwe 2021.

Mu Ukwakira 2020 hari kuba imikino ibiri ibanza yo mu matsinda yo gushaka itike y’Igikombe cy’Isi cya 2022 kizabera muri Qatar, ariko kubera icyorezo cyibasiye Isi kigatuma gahunda nyinshi zisubikwa, imikino yimuriwe [izatangira] muri Kamena 2021.

Hagati y’ayo marushanwa yombi, kuva tariki ya 4 kugeza ku ya 25 Mata 2020 ni bwo hari hateganyijwe Shampiyona Nyafurika y’abakinnyi bakina imbere mu bihugu byabo (CHAN 2020) muri Cameroun, ariko na yo birangira yimuriwe mu ntangiriro z’uyu mwaka.

Mu gushaka itike ya CAN 2021, imikino ibiri yakinwe yarangiye u Rwanda rubonye amanota abiri nyuma yo kunganya na Cap-Vert ubusa ku busa mu mikino yombi ndetse mu mibare biracyashoboka ko u Rwanda rwabona itike yo gukina iki Gikombe cya Afurika kizabera muri Cameroun muri Mutarama 2022.

Icyazamuriye amanota Mashami Vincent ni uburyo Amavubi y’abakina imbere mu gihugu yitwaye mu bihe bikomeye bya COVID-19, aho yageze muri ¼ cya CHAN 2020 yabereye muri Cameroun mu ntangiriro z’uyu mwaka ndetse akaba ari byo yari yasabwe ubwo yongererwaga amasezerano mu mwaka ushize.

Inkuru bifitanye isano: Kwirukana McKinstry byateje icyuho cy’amafaranga, Mashami ni we gisubizo gihari ubu

Mashami Vincent (ibumoso) yongerewe amasezerano y'umwaka umwe
Minisiteri ya Siporo na FERWAFA ntibiratangaza ku mugaragaro ko Mashami yongerewe amasezerano, ariko yasabwe kuzitwara neza mu marushanwa u Rwanda ruzakina muri uyu mwaka/Ifoto: Ububiko
U Rwanda ruzakira Mozambique mu kwezi gutaha
Uko Amavubi yitwaye muri CHAN 2020 byazamuriye amanota Mashami Vincent /Ifoto: CAF

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .