Arsenal yegukanye FA Cup ibona itike yo gukina Europa League (Amafoto)

Yanditswe na Eric Tony Ukurikiyimfura
Kuya 2 Kanama 2020 saa 07:30
Yasuwe :
0 0

Arsenal yatsinze Chelsea ibitego 2-1 ku mukino wa nyuma wa FA Cup wabaye ku wa Gatandatu, ibona itike yo gukina irushanwa rya Europa League mu mwaka utaha w’imikino.

Arsenal yegukanye iki gikombe ku nshuro ya 14 nyuma yo gutsinda umukino wabereye kuri Stade Wembley mu muhezo.

Pierre Emerick- Aubameyang yatsinze ibitego byombi byabonetse ku ruhande rw’ikipe y’umutoza Mikel Arteta mu gihe Chelsea itozwa na Frank Lampard, yo yari yatsindiwe na Christian Pulisic.

Arsenal yasabwaga gutsinda uyu mukino wa nyuma wa FA Cup kugira ngo yizere gukina imikino y’i Burayi mu mwaka utaha w’imikino nyuma y’uko muri Shampiyona isoreje ku mwanya wa munani.

Chelsea yabanje gufungura amazamu ku gitego cyatsinzwe na Christian Pulisic ku munota wa gatanu ubwo yaherezwaga na Olivier Giroud mu rubuga rw’amahina.

Umunya-Gabon Pierre- Emerick Aubameyang wakiniwe nabi na Cesar Aziplicueta mu rubuga rw’amahina, yishyuriye Arsenal ku munota wa 27, kuri penaliti mu gihe yanatsinze igitego cya kabiri ku munota wa 76 nyuma yo guherezwa na Nicolas Pépé akaroba umunyezamu Wilfredo Caballero.

Chelsea yasoje uyu mukino ari abakinnyi 10 mu kibuga nyuma y’ikarita itukura yahawe Mateo Kovačić wakiniye nabi Granit Xhaka ku munota wa 73, agahabwa ikarita ya kabiri y’umuhondo.

Kuvunikisha Cesar Aziplicueta mu gice cya mbere na Christian Pulisic mu minota ibanza y’igice cya kabiri, byagize ingaruka kuri Chelsea yavunikishije kandi Pedro Rodriguez mu minota ya nyuma.

Kwegukana iri rushanwa rya FA Cup byatumye Arsenal ikomeza gukora amateka yo kuba ikipe imaze kuryegukana kenshi (inshuro 14).

Arsenal izakina kandi umukino wa Community Shield uzayihuza na Liverpool yatwaye Shampiyona, ku wa 29 Kanama.

Umukino wabereye kuri Stade Wembley mu muhezo
Christian Pulisic aroba umunyezamu Emiliano Martinez mu minota ya mbere
Pierre-Emerick Aubameyang yishyuriye Arsenal kuri penaliti
Christian Pulisic ashimirwa na bagenzi be ku gitego yatsindiye Chelsea mu minota ya mbere
Pierre-Emerick Aubameyang yatsindiye Arsenal ibitego byombi yabonye muri uyu mukino
Bamwe mu bafana ba Arsenal barebeye umukino hanze ya Stade Wembley
Christian Pulisic akurwa mu kibuga nyuma yo kuvunika mu minota ya mbere y'igice cya kabiri
Frank Lampard yabuze ibisubizo ubwo Chelsea yavunikishaga abakinnyi mu gice cya kabiri
Pedro wari wagiye mu kibuga asimbuye, yavunitse asohorwa mu kibuga ari ku ngobyi
Umutoza wa Arsenal, Mikel Arteta ahabwa ikarita y'umuhondo nyuma yo kutemeranywa n'umusifuzi Anthony Taylor
Chelsea yasoje umukino ari abakinnyi 10 nyuma yo guhabwa ikairta itukura kuri Mateo Kovacic
Umunyezamu Emiliano Martinez ashimirwa na bagenzi be ubwo umukino wari urangiye
Kapiteni wa Arsenal, Aubameyang na Mikel Arteta bifotozanya igikombe
Arsenal yegukanye FA Cup ku nshuro ya 14, izakina Europa League mu mwaka utaha
Mikel Arteta ateruye igikombe cya mbere yegukanye atoza Arsenal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .